29, მარტი 2019 20:03:00
ინვესტიციები 4-ჯერ, დასაქმებულთა რაოდენობა კი 1/3-ით უნდა გაიზარდოს- მთავრობის სხდომაზე დღეს აჭარის მთავრობის თავმჯდომარემ მომდევნო 2 წლის გეგმა წარადგინა. როგორი საინვესტიციო პოლიტიკა აქვს რეგიონს ?
ინვესტორების დაინტერესება და 4 ჯერ მეტი პროექტის განხორციელება - დღეს გამართულ მთავრობის სხდომაზე რეგიონის პირველმა პირმა მომდევნო 2 წლის გეგმაზე ისაუბრა. თორნიკე რიჟვაძის თქმით, საინვესტიციო პოლიტიკის გაუნჯობესების მიზნით ინტენსიური მუშაობა მიმდინარეობს. მთავრობის თავმჯდომარის განცხადებით, მომდევნო 2 წლის მანძილზე ინვესტიციების მოცულობამ 2 მილიარდ ლარს უნდა მიაღწიოს., დასაქმებულთა რაოდენობა კი 6 ათასი ადამიანით გაიზარდოს.
თორნიკე რიჟვაძე ევროპული ინვესტიციების რეგიონში განხორციელებას მნიშვნელოვნად მიიჩნევს. რეგიონის პირველი პირი ამბობს, რომ მოლაპარაკებები სხვადასხვა ავტორიტეტულ კომპანიასთან მიმდინარეობს. მთავრობის თავმჯდომარის განმარტებით, სამშენებლო პროცესში მოქალაქეების ინტერესები მაქსიმალურად იქნება გათვალისწიბებული.
დღესვე გადაწყდა, რომ კომპანია ,,ორბი ჯგუფ მილენიუმს ორ მილიონამდე ლარის პირგასამტეხლო დროებით შეუჩერდეს. მშენებლობისთვის კი ვადა წელიწადნახევრით გაუხანგრძლივდეს. მთავრობის წევრებმა კომპანიების მხრიდან ხელშეკრულებით ნაკისრი ვალდებულებების დარღვევის შემთხვევაში პირგასამტეხლოს შეჩერების წესიც განსაზღვრეს. ამოქმედდა დამატებითი წესი, რომლითაც ახალი ხელშეკრულკების გაწერა მოხდება.
მთავრობის დღევანდელ სხდომაზე განათლების ქალაქის მშენებლობის საკითხიც განიხილეს. შეხვედრაზე ითქვა, რომ რამდენიმე ლოკაცია უკვე შერჩეულია. პროექტი, რომლის განხორციელება 2 თვეში უნდა დაიწყოს, ბაღების, ბიბლიოთეკების, საგანმანათლებლო დაწესებულებებისა და რეკრეაციული ზონების მოწყობას ითვალისწინებს.
მთავრობის დღევანდელ სხდომაზე სულ 3 საკითხი განიხილეს.