01, აპრილი 2019 20:05:00
პოლიეთილენის პარკების წარმოება და გაყიდვა აიკრძალა. რეგულაცია დღეს ამოქმედდა. რას გულისხმობს დოკუმენტი უფრო დეტალურად და ასრულებენ თუ არა მეწარმეები მის მოთხოვნებს ?
რეგულაცია, რომელიც ძალაში პირველი აპრილიდან შევიდა , ზოგიერთი ტიპის პოლიეთილენის პარკის მოხმარების აკრძალვას გულისხმობს. საქართველოს კანონმდებლობით მაღაზიის მესაკუთრე ვალდებულია გაფრთხილებიდან 10 დღის განმავლობაში აკრძალული პარკები ქსელიდან ამოიღოს.
რეგულაციის შედეგად მიღებულ ზარალზე საუბრობენ მეწარმეები. „ზუგოს“ მენეჯერის თქმით, შესაბამისი სამსახურებისგან იყო დაპირება, რომ კომპანიებს ვადა მიმდინარე წლის სექტემბრამდე ექნებოდათ. გოგიტა ტაკიძის თქმით, ეს საკმარისი პერიოდი იქნებოდა კომპანიას ბიოდეგრადირებადი პარკები ეწარმოებინა. კომპანიამ, დღეს პოლიეთილენის პარკების წარმოება შეწყვიტა.
პარკი პოლიეთილენისგან მზადდება, რომლის დაშლას ასეულობით წელი სჭირდება. ბიოდეგრადირებადი პარკი კი 24 თვის განმავლობაში ქრება.
რეგულაციას მონიტორინგს რანდენიმე ორგანო გაუწევს, მათ შორის გარემოს დაცვითი ზედამხედველობის დეპარტამენტი, ფინანსთა სამინისტრო და ადგილობრივი თვითმმართველობის ორგანოები. ბათუმის მერიამ შემოწმებები უკვე დაიწყო. დარღვევის აღმოჩენის შემთხვევაში მეწარმე პირველ ჯერზე 500 ლარით, განმეორების შემთხვევაში კი 1000 ლარით დაჯარიმდება. ასევე მოხდება შესაბამისი პროდუქციის კონფისკაცია.
პლასტიკისა და ბიოდეგრადირებადი პარკების იმპორტი თურქეთიდან , ირანიდან, ევროპის ქვეყნებიდან განხორციელდება.