როგორ უნდა გაშუქდეს კონფლიქტები? რა უნდა იცოდნენ მედიის წარმომადგენლებმა საომარ ვითარებაში? ,,ღირსეული პასუხი 2019“ დაიწყო. თავდაცვის სამინისტროს მედია სწავლება სენაკში, მიმდინარეობს. სამხედროების გამოცდილებას სულხან მესხიძე და ოპერატორი ბაჩო გრიგოლია იზიარებენ.
რეპორტიორების დილა 6 საათზე დაიწყო. საქართველოს ჰიმნის ფონზე, სამხედროებმა მედიის წარმომადგენლებს ერთ ზოლში, ერთმანეთის გასწვრივ დგომის და დღის წესრიგის შესახებ ინფორმაცია მიაწოდეს. „ღირსეული პასუხის“ მონაწილეები ინსტრუქტორის მითითებების შესრულებას ცდილობენ. დღე სირთულეებით იწყება.
საუზმის შემდეგ მედიის წარმომადგენლებმა საკონფერენციო ოთახში გადაინაცვლეს, სადაც მათ თავდაცვის სამინისტროს პრესცენტრის წარმომადგენელი ავღანეთში ქართველი სამხედროების მისიას აცნობს, რომელიც შეიარაღებული ძალების წარმომადგენლების ცხოვრებას და გამოწვევებს კადრზე აღწერს. უნიკალური არქივი 300-მდე ჟურნალისტურ ნაშრომს ინახავს. ირკვევა, რომქართველი ჯარისკაცები ქვეყნის ინტერესებს 7 რაიონში იცავენ. ქართულ ჯარს ავღანეთის მისიაში 30-მდე დანაკარგი აქვს.დაღუპულია 10-მდე სამხედრო რეპორტიორი, მთელი მსოფლიოდან, რომლებიც საომარ ვითარებებს აშუქებდნენ.
ერთ-ერთი მთავარი გამოწვევა პროპაგანდის შემცველი ინფორმაციისთავიდან აცილებაა. სოციალური მედიის ეპოქაში დეზინფორმაციის იდენტიფიცირება შედარებით გამარტივდა, თუმცა ამ კუთხით პრობლემები მაინც რჩება.
საომარი ვითარების დროს დაჭრილი სამხედროებისთვის და მედიის წარმომადგენლებისთვის პირველადი სამედიცინო დახმარების აღმოჩენა - ეს კიდევ ერთი კომპონენტია იმ კურსისა, რომლის ფარგლებშიც სპეციალისტების მხრიდან შესაბამისი რეკომენდაციები გაიცა. ჟურნალისტები სამედიცინო აღჭურვილობისა და სამხედროების გამოცდილებას გაეცნენ.
კონფლიქტების გაშუქებას სტრესული გარემოც ახლავს. სამხედრო მოქმედებების დროს ჟურნალისტებსაც არანაკლებ რთულ ვითარებებში უწევთ მუშაობა. როგორ უნდა იმუშაოს რეპორტიორმა ცხელ წერტილში და როგორ უნდა ვმართოთ სტრესი?მეოთხე ხელისუფლების წარმომადგენლებმა რჩევები ფსიქოლოგისგანაც მოისმინეს. სპეციალისტის რეკომენდაციით, კონფლიქტების გაშუქების შემდეგ სასურველია დასაქმებული დროებით შვებულებაში გავიდეს და დრო ოჯახურ გარემოში გაატაროს, ეს კი ემოციური ფონისგან დროულად გათავისუფლებაში დაეხმარება.
პროექტ „ღირსეული პასუხის“ მონაწილეებისთვის სამხედრო ბაზაზე პირველი დღე აღმოჩენებით და სიახლეებით დატვირთული იყო. მათ კითხვებს სხვადასხვა მიმართულების სპეციალისტები პასუხობდნენ. ტრენინგ-კურსი კვირის ბოლომდე გაგრძელდება, რომლის ფარგლებშიც ჟურნალისტებს მუშაობა საველე პირობებშიც მოუწევთ.
15
s
s
s