22, ივლისი 2019 20:40:00
ტურისტული ქალაქი საპლაჟო ინფრასტრუქტურის გარეშე. მაშინ როდესაც ვიზიტორების რაოდენობა ქობულეთში ყოველდღიურად მატულობს, მერია საშხაპეებისა და გასახდელების მოწყობას არ ჩქარობს. თინათინ ჭკუასელი არკვევდა, რატომ არ დაიჭირა თადარიგი უწყებამ , რომელიც სტუმრებს მუნიციპალიტეტში ჩასვლისკენ აქტიურად მოუწოდებს?
მოუწესრიგებელი სანაპირო ზოლი, საშხაპეების და გასახდეელების გარეშე დარჩენილი ქობულეთის პლაჟი და უკმაყფილო ადგილობრივები. ტურისტული ქალაქი ზაფხულს მოუწესრიგებელი ინფრასტრუქტურით შეხვდა.
ტურისტული ქალაქისთვის შეუფერებელ ინფრასტრუქტურაზე მოსახლეობასთან ერთად, რეგიონში ჩამოსული სტუმრებიც საუბრობენ. ისინი სანაპიროსთან ავტომობილების მიერ ჩახერგილ ტერიტორიაზეც ამახვილებენ ყურადღებას.
წელს ქობულეთის პლაჟებზე საშხაპეებისა და გასახდელების განსათავსებლად მერიას 32 441 ლარი აქვს გამოყოფილი, თუმცა რამდენად მოესწრება მათი მოწყობა ტურისტული სეზონის დასრულებამდე უცნობია. ოპოზიცია კი თვლის, რომ მოუწესრიგებელი სანაპიროს გამო მერიას მოსახლეობისთვის ბოდიში აქვს მოსახდელი.
ქობულეთის მერიაში სატელეციზიო კომენტარი არ გააკეთეს. სატელეფონო საუბარში კი მუნიციპალიტეტის ხელმძღვანელმა მხოლოდ საშხაპეებთან და გასახდელებთან დაკავშირებით გააკეთა კომენტარი. მირიან ქათამაძის თქმით, დაგვიანების მიზეზი სატენდერო პროცედურებია.
საშხაპეების და გასახდელების მოსაწყობად ხელშეკრულება ორ კომპანიასთან შპს „იმპექსთან“ და შპს „ბილდისთან“ არის გაფორმებული . არსანიშნავია ისიც რომ წელს ტურისტული სეზონისთვის ქობულეთის მუნიციპალიტეტში ინფრასტრუქტურული თუ კულტურული ღონისძიებებისთვის მილიონ ლარამდეა გათვალსიწინებული.