ხულო-ზარზმის გზის რეაბილიტაციას, 5 კილომეტრიან მონაკვეთზე კომპანია „მამისონი“ განახორციელებს. დანარჩენ 42 კილომეტრზე სამუშაოების შესყიდვისთვის კი ტენდერი ჯერ კიდევ მიმდინარეა. პრეტენდენტებს შორის ერთ-ერთი კი კომპანია „სინოჰიდროა“, რომლის რეპუტაცისაც ოპოზიცია ეჭვს ქვეშ აყენებს. საქართველოს საავტომობილო გზების დეპარტამენტში კი ამ კომპანიების მიერ უპასუხისმგებლოდ შესრულებულ მომსახურეობას უარყოფენ.
ეს ავარიული გზა ხულო-ზარზმის დამაკავშირებელი ერთადერთი გზაა. კეთილმოწყობილი თითქმის აღარავის ახსოვს. მის რეაბილიტაციაზე საუბარი ადგილობრივებს გასული საუკუნის 80-იანი წლებიდან ესმით, თუმცა შედეგი ვერა და ვერ დაინახეს. იმედის მომცემი განცხადებები იშვიათი არც ბოლო წლებში იყო.
„ქართული ოცნების“ ხელისუფლების პირობებში, გზის სარეაბილიტაციოდ აქტირად შესყიდვების გამოცხადება 2018 წლიდან დაიწყო. ტენდერი სხვადაასხვა მიზეზით სწორედ იმდენჯერ შეწყდა, რამდენჯერაც გამოცხადდა. უკანასკნელად მიმდინარე წლის მარტში. საქართველოს საავტომობილო გზების დეპარტამენტი მომსახურებას ისევ ყიდულობს. ჯამში კეთილმოსაწყობი 47 კილომეტრიანი მონაკვეთია. რეაბილიტაცია ორ ნაწილად დაიგეგმა. უკვე ცნობილია, რომ გზის 5 კილომეტრს შპს „მამისონი“ ჩაუტარებს რეაბილიტაციას. ტენდერი 14 მილიონ 581 880 ლარად მოიგო. მამისონი ის კომპანიაა, რომელმაც 3 მილიონ 400 ათას ლარად ჩაქვში სასაფლაო ტერიტორია მოაწყო, თუმცა ექსპლუატაციაში ამ დრომდე არ შესულა და რომლის საქმესაც პროკურატურა გასული წლიდან სწავლობს.
რაც შეეხება დანარჩენ 42 კილომეტრს, ტენდერი ჯერ არ დასრულებულა, თუმცა პრედენდენტებს შორის ერთ-ერთი კომპანია „სინოჰიდროა“. ოპოზიცია მის რეპუტაციასაც ეჭვქვეშ აყენებს. ამბობენ, რომ არაერთ ქვეყანაში აქვს ხარვეზებით წარმოებული სამუშაო, საქართველოში კი ამას შემოვლითი გზის ბათუმი-ქობულეთის მონაკვეთზე შესრულებული სამუშაოები ცხადყოფს.
სახელმწიფო შესყიდვების სააგენტოს ვებ-გვერდზე მოცემულ სიებში „სინოჰიდრო“ არ იძებნება. კომპანია „მამისონი“ კი თეთრს სიაში ირიცხება. საგზაო დეპარტამენტში აცხადებენ, რომ აქედან გამომდინარე, არ ჰქონდათ საფუძველი, „მამისონისთვის“ მომსახურებაზე უარი ეთქვათ, ტენდერი კი რომელშიც „სინოჰიდრო“ ერთ-ერთი პრეტენდენტია, ჯერ კიდევ მიმდინარეა. დეპარტამენტში უარყოფენ ამ კომპანიების მიერ უპასუხისმგებლოდ შესრულებულ სხვა მომსახურებასაც.
ჩვენ ცხადია ვცადეთ დაკავშირება როგორც „მამისონთან“, ისე კომპანია „სინოჰიდროსტან“. მცდელობები უშედეგო აღმოჩნდა. კომპანიები ჩვენთვის ხელმისაწვდომი არ აღმოჩნდა. მათი საკონტაქტო ინფორმაცია ვერც საქართველოს საგზაო დეპარტამენტში მოგვცეს. ტენდერის პირობების მიხედვით, ხულო-ზარზმის 47 კილომეტრიანი გზის სრული რეაბილიტაცია ხელშეკრულების გაფორმებიდან, ორ წელში უნდა დასრულდეს. „მამისონს“ კი მისი პასუხიმგებლობის ფარგლებში, 5 კილომეტრიანი გზის მოსაწყობად 18 თვიანი ვადა აქვს.
7
s
s
s