22, ივლისი 2020 21:15:00
რაში ვუხდით ხელფასებს საკრებულოს დეპუტატებს? ანუ არიან თუ არა წარმომადგენლობითი ორგანოს წევრები ჩართულები გადაწყვეტილებების მიღების პროცესში? მესამე სექტორმა კანონმდებლების აქტიურობა შეაფასა. აღმოჩნდა, რომ ბათუმის საკრებულოს 25 წევრიდან, 40 პროცენტი სხდომებზე საერთოდ არ აქტიურობს, ანუ არ სვამს კითხვებს, არ აკეთებს განცხადებებსა და მოხსენებს და არ აქვს ინიციატივები. გამოდის, რომ ანაზღაურებას ერთდერთი ფუნქციის, ხელის აწევის გამო ვუხდით.
სტუდენტური გაცვლითი პროგრამა უცხოეთში, 40 ათას ლარიანი ბიუჯეტით - ეს ერთადერთი ინიციატივაა, რომელიც ბესარიონ გოგოტიშვილმა ბათუმის საკრებულოში დააყენა. ინიციატივა წერილობით დარეგისტრირებული აქვს, თუმცა საბოლოო ფორმა ისევ არ აქვს. გოგოტიშვილი საკრებულოში „ქართული ოცნების“ პროპორციული სიით მოხვდა. ამბობს, რომ ინიციატივის დამუშავება პანდემიის გამო ვეღარ შეძლო.
ვინ როგორ აქტიურობდა საკრებულოს სხდომებზე და რამდენად გამოირჩეოდნენ წევრები საზოგადოებისთვის სასარგებლო სხვადსხვა ინიციატივების წარდგენით, კველვა „საზოგადოებრივი განვითარების აკადემია“-მ გამოაქვეყნა. 2020 წლის პირველი კვარტალის, ანუ იანვარ-მარტის ჩათვლით, ფაქტიურად მხოლოდ ხელის ამწევის ფუნქცია ეკისრათ შემდეგ წევრებს: ლაშა სირაბიძეს, თამაზ სალუქვაძეს, ნერიმან ცინცაძეს, ომარ მახარაძეს, ანზორ დევაძეს, ბესარიონ გოგოტიშვილს, ელგუჯა ანდრიაძეს და ირაკლი თოფურიძეს. ჩვენ თითოეულ მათგანს დავუკავშირდით, თუმცა სხვადასხვა მიზეზით, მათ სატელეფონო კომენტარზეც კი უარი გვითხრეს.
ორგანიზაციის მიერ წარმოებული კვლევის მიხედვით, ოპოზიციიდან ყველაზე ნაკლებად „ნაციონალური მოძრაობის“ წევრი ნოდარ დუმბაძე აქტიურობდა. დუმბაძე შენიშვნას არ იღებს და აცხადებს, რომ მმართველი გუნდი მის და ზოგადად პარტიის წინადადებებს ბლოკავს. გარდა ამისა, აცხადებს, რომ ამგვარი შედეგის მიზეზი არის ისიც, რომ ბოიკოტის ნიშნად, სხდომებზე დიდი ხანია აღარ დადიან.
რაულ თავართქილაძე საკრებულოში დამოუკიდებელი, უპარტიო წევრია. კვლევაში ისიც მოხვდა. დოკუმენტში აღნიშნულია, რომ სხდომებზე შენიშვნებს გამოთქვამს, თუმცა ფაქტიუარდ არ მუშაობს კომისიის სხდომებზე. ამბობს, რომ „საზოგადოებრივი განვითარების აკადემიის“ კვლევა არაკომპეტენტურადაა მომზადებული.
„საზოგადოებრვი განვითარების აკადემიის“ კვლევის მიხედვით, ბათუმის საკრებულოს 25 წევრიდან, 10 პასიურია, მათ შორის ისინიც, რომელთა შემოსავლებიც იანვარ-მარტში განსაკუთრებით მაღალია. ამავე დოკუმენტის მიხედვით, „ქართული ოცნებიდან“ შეკითხვებით, შეფასებებით, თუ კონკრეტული წინადადებებით შედარებით აქტიური იყო ნატალია ძიძიგური, ასევე არჩილ მამულაძე - „პატრიოტთა ალიანსიდან“. კვლევის მიხედვით, წლის პირველ კვარტალში საკრებულოს წევრებს ჯამში ხელფასის სახით, 82 ათას 200 ლარი აქვს აღებული.