22, ივლისი 2020 19:56:00
არაადაპტირებული კორპუსი, რის გამოც 14 წლის შეზღუდული შესაძლებლოს პირი დაშავდა. კობალაძის 15 ნომერში მდებარე სახლს პანდუსი არ აქვს. შენობაში მცხოვრებ, 14 წლის ბიჭს სახლში მისვლამდე ბარიერების დაძლევა უწევს. არადა კონსტრუქცია პროექტით გათვალისწინებულია. რატომ არ სთხოვს მერია პასუხს მშენებელ კომპანიას? უწყებაში თავი იმით იმართლეს, რომ ობიექტს მშენებარეს სტატუსი აქვს. რეპორტაჟს მთავარ გამოშვებაში ნახავთ.
14 წლის გიგამ სახეზე ეს დაზიანება ორი დღის წინ მიიღო. დედას იგი ეტლით, საცხოვრებელი კორპუსის კიბიდან გადაუვარდა. ეტლის დამორჩილება დედამ სწორედ იმ მომენტში ვეღარ შეძლო, როცა ლიფტიდან გამოვიდა და მოზარდის ეზოში გაყვანას ცდილობდა. კორპუსი, ეზოს მხოლოდ კიბით უკავშირდება და იგი ადაპტირებული არ არის.
კობალაძის ქუჩაზე, ეს ახალი კორპუსი შპს „ლამინი.ჯიმ “ სამი წლის წინ ააგო, თუმცა მის ადაპტირებას, ამ ხნის განმავლობაში მაცხოვრებლები ამაოდ ელოდებიან, არადა ამბობენ, რომ კარგად ახსოვთ მშენებლობის დასაწყისში წარდგენილი პროექტი. იქ, სადაც ესკიზის მიხედვით, პანდუსი უნდა იყოს, დღეს სასურსათო მაღაზიის მაცივარი დგას.
რატომ არ შეესაბამება მშენებლობისას ბანერზე დატანილი ესკიზი რეალურ კორპუსს, ან რატომ არ უზრუნველყო მშენებელმა სამი წლის მანძილზე პანდუსის მშენებლობის შემდგომ მოწყობა, „ლამინი.ჯის“ წარმომადგენელმა ვერ გვიპასუხა. მხოლოდ პირობა დადო, რომ ადაპტირებისთვის სამუშაოებს ხვალიდან დაიწყებს.
კორპუსის ესკიზის ბანერი აქ არ აღარ არის, თუმცა დიზაინსა და საცხოვრებლის რეალურ იერსახეს შორის რომ ეს ერთი სხვაობა ნამდვილად არის, ადგილობრივების თქმით მარტივი შესამჩნევი იქნებოდა. აქ ასევე ამტკიცებენ, რომ ბათუმის მერიის შესაბამის სამსაუხრს მშენებლობისას პროექტთან შესაბამისობა რომ შეემოწმებინა, ხარვეზი არ იარსებებდა და არც 14 წლის მოზარდი დაშავდებოდა. რატომ გამოეპარა მერიას დეტალი მონიტორინგისას, ან ხდებოდა თუ არა პროექტის შესაბამისობის შემოწმება მშენებლობისას პერიოდულად, „ბათუმის მუნიციპალურ ინსპექციაში“ ამტკიცებენ, რომ შესაბამისობას მხოლოდ მიღება-ჩაბარებისას ამოწმებენ, კობალაძის 15-შ არსებული კორპუსი კი ჯერ ისევ მშენებარეს სტატუსს ატარებს.