„მედია გაჩერებას არ აპირებს“ - ჟურნალისტთა კორპუსი აჭარიდან მიმდინარე პროცესებით შეშინებულ ხელისუფლებას ღიად ეუბნება, რომ პერფორმანსებს აუცილებლად მიიღებს. რეპორტიორები სხდომის გასაიდუმლოებას სწორედ დაგეგმილ პროტესტს უკავშირებენ და ამბობენ, რომ „სირაქლემას პოზიციაში“ ყოფნა, მთავრობას დიდად არ წაადგება. აქვე, საგულისხმოა, რომ გასვლით სხდომებს აჭარის მთავრობა საკმაოდ ხშირად მართავს, თუმცა აქამდე არსებული პრაქტიკით, ჟურნალისტები ყოველთვის ვიყავით საქმის კურსში. რატომ შეცვალა ადგილობრივმა ხელისუფლებამ სტრატეგია? ია გოლიაძე ესაუბრა რეგიონში მოქმედ რეპორტიორებს.
ეს კადრები აჭარის მთავრობის გუშინდელი გასვლითი სხდომიდანაა. ადგილობრივმა ხელისუფლებამ საქმის კურსში მხოლოდ აჭარის მაუწყებელი და „მაესტრო“ ჩააყენა. ადმინისტრაციის საზოგადოებასთან ურთიერთობის სამსახურს კრიტიკული მედიის გაფრთხილება საჭიროდ არ ჩაუთვლია, შესაბამისად მასალის ტრანსლირება მხოლოდ ამ ორი არხის მეშვეობით მოხდა. რატომ არ უთხრეს მთავრობის სხდომის გასაშუქებლად მედია კორპუსს? კითხვა ჟურნალისტებმა მალევე დასვეს, თუმცა ადგილობრივი ხელისუფლება მის პიართან ერთად დღემდე დუმს. რეპორტიორებს არც ტელეფონზე და არც სოციალურ ქსელში პასუხობენ.
ნატო გოგელია აჭარაში „TV პირველის“ რეპორტიორია. დარწმუნებულია, რომ გასვლითი სხდომის დამალვის მიზეზი ქვეყანაში ბოლო დროს მიმდინარე მოვლენებია. ჟურნალისტი მიიჩნევს, რომ მთავრობა იმ პერფორმანსის დადგმას გაექცა, რომელსაც ადგილობრივი მედია კორპუსი ლექსო ლაშქარავას გარდაცვალების გამო გეგმავდა.
ტელეკომპანია „მთავარის“ რეპორტიორს 25 წლიანი პრაქტიკის განმავლობაში მსგავსი ფაქტი არ ახსოვს. თეა ვაშალომიძე ამბობს, რომ სხვების მსგავსად, ჩანიშნული სხდომის შესახებ, თავადაც დაგვიანებით გაიგო. მიიჩნებს, რომ ხელისუფლება ამ ფორმით სირაქლემას პოზიციაშია.
მთავრობის გასვლითი სხდომის შესახებ არ გააფრთხილეს არც „ბათუმელები“. კრიტიკული მედიის წარმომადგენელს პასუხი კითხვაზე „რატომ დაიმალა შეხვედრა“, დღემდე ვერ მიუღია. ნანა კვაჭაძეს აჭარის მთავრობის პიარი ტელეფონზე დღემდე არ პასუხობს. მიზეზი დარწმუნებით იცის. ამბობს, რომ ეს ბოლო დროის მოვლენებია.
მთავრობის სხდომის პირდაპირი ეთერში ჩართვა შოკისმომგვრელი იყო TV 25-საც. სულხან მესხიძე ერთადერთი იყო, ვინც გასაიდუმლოების მიუხედავად, შეხვედრაზე დაგვიანებით მივიდა. მაღალჩინოსნები „მაცნეს“ კამერებს ბუნებრივია, დაემალნენ. ისინი ადგილიდან სავარაუდოდ ძალოვანი სტრუქტურების მანქანებით მას შემდეგ გააპარეს, რაც ჟურნალისტი პირდაპირ ეთერში ჩაერთო.
რა გახდა იმის მიზეზი, რომ აჭარის მთავრობა ჟურნალისტებს დაემალა? – მთავრობის პრესსამსახურში „TV 25-ის“ სატელეფონო ზარებს არ უპასუხეს. შესაბამისად, პასუხგაუცემელი დარჩა კითხვა, რა კრიტერიუმებით შეირჩა პირდაპირი ტრანსლირებისთვის რეგიონში, ერთადერთი ტელევიზია - აჭარის მაუწყებელი. სატელევიზიო კომენტარი არ გაკეთდა არც აჭარის ტელევიზიის საინფორმაციო სამსახურში, გვითხრეს, რომ გასვლითი სხდომის შესახებ ინფორმაცია მთავრობის პრესსამსახურისგან მიიღეს. დასვა თუ არა კოლეგების შესახებ კითხვა, მუწყებლის რეპორტიორმა, რომელიც შეხვედრის გასაშუქებლად მარტო აღმოჩნდა? ემზად დიასამიძეს დღეს ტელეფონი გათიშული ჰქონდა.