ობიექტური მედიის მუშაობა დემოკრატიის განვითარებაში ფუნდამეტურ როლს თამაშობს. ჟურნალისტები, მათ მიერ გაშუქებული თემებით, ხშირად ცვლიან ადამიანების ცხოვრებას უკეთესობისკენ. რეპორტიორების დასმული კრიტიკული კითხვები, ხშირად, ხელისუფლების წარმომადგენლებს ამათუ იმ საკითხზე დაფიქრებისკენ უბიძგებთ, რაც საბოლოო ჯამში, საზოგადოებრივი კეთილდღეობის დამყარებას უწყობს ხელს. რა დადებითი შედეგები მოაქვს პრესისა და მედიის მუშაობას მოქალაქეებისთვის? ჩვენ დღეს ამას TV 25-ის მიერ მომზადებული რეპორტაჟების საფუძველზე გიამბობთ. ბოლო ორ წლიან არქივს თვალი ია გოლიაძემ გადაავლო.
TV 25-ის რეზონანსული რეპორტაჟების სერიას პანდემიის პერიოდიდან ვიწყებთ. მართალია, რაოდენობიდან გამომდინარე მათი ერთ სიუჟეტში მოქცევა რთულია, თუმცა აქცენტი ყველაზე მნიშვნელოვანი ამბების სერიაზე გავაკეთეთ.
2020 წელი. ოქტომბერი. ბათუმის შემოსასვლელში საკონტროლო პუნქტია. კორონა ვირუსის პრევენციისთვის, ბლოკპოსტი ქალაქში შემომსვლელთა და გამსვლელთა მონიტორინგს ახორციელებს. ჩვენს მიერ მომზადებულ რეპორტაჟში ვაჩვენეთ, რომ საველე კარავი უფუნქციოდ დგას, პოლიციელები ადგილზე არიან და თერმოსკრინინგსაც არავინ ატარებს. არადა ხელისუფლება დაწესებული შეზღუდვის ეფექტურობით თავს იწონებდა.
გამოხმაურება მოჰყვა, მაუწყებლის მიერ მომზადებულ სიუჟეტს, სადაც მხილებული იყო, პანდემიის პერიდოში, კომენდანტის საათის მოქმედების დროს გრანდიოზული წვეულების ჩატარების გეგმა. ღონისძიების ორგანიზატორები ელექტრონული მუსიკის მოყვარულებს მაქსიმალურ გართობას ჩაკეტილ სივრცეში სთავაზობდნენ. ე.წ ივენთის შესახებ წინასწარ იყო ინფორმირებული პოლიცია, რომელიც სამართალდარღვევაზე რეაგირების მოხდენას არ აპირებდა. ჩვენმა რეპორტაჟმა გართობის მსურველებს გეგმები ჩაუშალა და სოციალურ ქსელში დაწერეს, რომ წვეულება აღარ შედგებოდა.
ხმაურიანი იყო TV 25-ის მიერ მომზადებული რეპორტაჟების სერია, რომლის შედეგადაც რამდენიმე ჩინოვნიკმა თანამდებობა დატოვა. ერთ-ერთი იყო ინგა გოგიბერიძე, რომელსაც „მაცნესთან“ თანამშრომლები ნეპოტიზმსა და კორუფციაში ადანაშაულებდნენ. მაუწყებელმა საჯარო ბიბლიოთეკის ყოფილი დირექტორი პლაგიატშიც ამხილა, გაშიფრა სქემა, როგორ ასაქმებდა იგი ახლობლებს ბიბლიოთეკაში და როგორ აფორმებდა უკანონო ხელშეკრულებებს ერთპიროვნულად, სარგებლის მიღების მიზნით. იგი სამსახურიდან მეორე დღესვე გაუშვეს. ჩვენს მიერ მომზადებული კრიტიკული რეპორტაჟის საფუძველზე, თანამდებობას ჩამოაშორეს სულხან ოქროპირიძეც, რომელიც აჭარის მუზეუმის დირექტორი იყო. მაღალჩინოსანმა პანდემიის დროს, როცა სამსახურეობრივ მოვალეობას დისტანციურად ასრულებდა, მანქანით გადაადგილებისთვის 200 ლიტრი საწვავი მოიხმარა. გასახსენებელია, ღურტას საბავშვო ბაღის გამგის ამბავიც, რომლის თანამდებობიდან გათავისუფლების საკითხი დღის წესრიგში მაშინ დადგა, როდესაც „TV 25“-მა დაწესებულებაში არსებული სიტუაციის ამსახველი ვიდეო კადრები გაავრცელა. ფარული ჩანაწერების მიხედვით, მედეა მამულაძე თანამშრომლებს სიტყვიერ და ფიზიკურ შეურაცხყოფას აყენებდა. სკანდალურად წავიდა პოსტიდან ხულოს საბავშვო ბაღების გაერთიანების დირექტორი, გურამ ხოზრევანიძე, რომელმაც დაწესებულებაში ერთ-ერთ პოზიციაში, ნეპოტიზმის ნიშნით, შვილი დაასაქმა. თითქმის ანალოგიურ სიტუაციაში აღმოჩნდა ხელვაჩაურის მერიის ადმინისტრაციის უფროსი, რომელიც ცოლმა ძალადობაში დაადანაშაულა, ფაქტის გაშუქების შემდეგ კი პოსტი, საკუთარი განცხადების საფუძველზე დატოვა.
"TV 25"-ის ეთერში გასული კრიტიკული რეპორტაჟი აღმოჩნდა მიზეზი პანდემიის პირობებში, ხულოს მერიის თანამშრომლებისთვის გადაცემული პრემიების უკან დაბრუნება. მაშინ, როცა ქვეყანა კორონავირუსით გამოწვეულ კრიზისს ებრძოდა,უწყებამ ანაზღაურებაზე 50 %-იანი დანამატი 16 დასაქმებულს ჩაურიცხა.
რეაგირების გარეშე არ დარჩენილა „მაცნეს“ მიერ მომზადებული რეპორტაჟი, რომელიც ინდოელი სტუდენტების პრობლემებს ასახავდა. უცხო ქვეყნის მოქალაქეებს დავა ბათუმის სახელმწიფო უნივერსიტეტთან ჰქონდათ. თემა ფინანსურ საკითხებს შეეხებოდა. პრეტენზიების ეთერში გასვლის შემდეგ საგანმანათლებლო დაწესებულებამ საერთაშორისო სტუდენტების მიმართ პოლიტიკა აშკარად შეცვალა.
„მაცნეს“ კიდევ ერთი რეპორტაჟი, რომელსაც მყისიერი რეაგირება მოჰყვა. კობალაძის 15 ნომერში მდებარე სახლს პანდუსი არ ჰქონდა, არაადაპტირებულ კორპუსში კი 14 წლის შეზღუდული შესაძლებლობის მქონე ბიჭს, გადაადგილება უჭირდა. მოზარდი პრობლემის გამო დაშავდა კიდეც. TV 25-ის ეთერში კრიტიკული სიუჟეტის გასვლის შემდეგ, საკითხი მალევე გადაიჭრა.
ობიექტური და კრიტიკული მედიის როლი საზოგადოებრივი კეთილდღეობის შექმნაში რომ დიდია, ამას 85 წლის ხანდაზმულის, ტანია გორგილაძის ამბის გაშუქებაც მოწმობს. მას შემდეგ, რაც ჩვენს მაყურებელს უკიდურესად გაჭირვებული ქალის ყოფაზე ვუამბეთ, მისი ცხოვრება რადიკალურად შეიცვალა. მოხუცმა დახმარება უამრავი ადამიანისგან მიიღო და ფაქტობრივად აღარ დარჩა სასესხო ვალდებულება, რომელიც შვილის გამო აიღო. შეძლო თბილ ოთახში დაძინება და აქვს ელემენტარული საყოფაცხოვრებო ტექნიკა, თუმცა რაც ყველაზე მთავარია, მარტიხელა ქალს ქუჩა-ქუჩა მოწყალების თხოვნა აღარ უწევს.