04, დეკემბერი 2018 20:02:00
გიჩვენებთ სოციალურად დაუცველ 30 -მდე ოჯახს, რომელიც საცხოვრისით უზრუნველყოფას ითხოვს. იმის გამო, რომ უსახლკაროების მოთხოვნები ხელისუფლებამ აქამდე არ გაითვალისწინა, ძალისმიერ მეთოდებს გუშინ გვიან ღამით მიმართეს. მოქალაქეებმა სამხედრო ბაზის ყოფილი შენობაში შეჭრა სცადეს.
ეს თავდაცვის სამინისტროს ბალანსზე არსებული სამხედრო ბაზის ყოფილი შენობაა. სოციალურად დაუცველი ოჯახები, რომლებსაც წლების მანძილზე ნაქირავებ ბინებში უწევთ ცხოვრება სახელმწიფოსგან ტერიტორიის დათმობას ითხოვენ. ამბობენ, რომცხოვრება უკიდურესად მძიმე პირობებში უწევთ.
30-მდე ოჯახი, რომლებსაც მათივე თქმით, ალტერნატიული ფართობი არ გააჩნიათ, სახელმწიფოს კუთვნილი ტერიტორიის დატოვებას არ აპირებენ. სოციალურად დაუცველებთან ერთად არიან მრავალშვილიანებიც. ისინი შესაბამისი უწყებებისგან წლების მანძილზე მხოლოდ დაპირებები ისმენენ.
ე.წ ბარცხანის დასახლებაში არსებული შენობის მოქალაქეებისთვის გადაცემას ტერიტორიაზე მცხოვრებლები ეთანხმებიან.
პრობლემის შესახებ დღეს, აჭარის ჯანდაცვის სამინისტროში იმსჯელეს. შეხვედრა მედიისთვის დახურული იყო . მინისტრის მოადგილე ირწმუნება, რომ ოჯახების მდგომარეობას ინდივიდუალურად შეისწავლიან და მათ მოთხოვნებს ეტაპობრივად დააკმაყოფილებენ.
თავდაცვის სამინისტროს სამხედრო ბაზის ყოფილი შენობაში, დაახლოებით 30 ოჯახი გუშინ, გვიან ღამით უკვე მესამედ შეიჭრა.