18, აპრილი 2017 20:04:00
2017-2018 სასწავლო წლისთვის ბათუმის საბავშვო ბაღებში აღსაზრდელების ჩარიცხვა სამ ეტაპად განხორციელდება. ჩარიცხვისას უპირატესობა იმ სოციალური სტატუსის მქონე ბავშვებს მიენიჭებათ, რომლებიც ელექტრონულ რეგისტრაციას 10 ივლისის ჩათვლით გაივლიან. ესენია: მრავალშვილიანი, სოციალურად დაუცველთა ოჯახები, რომლებსაც 100 000 და უფრო ნაკლები სარეიტინგო ქულა აქვს, მარტოხელა დედები, საქართველოს ტერიტორიული მთლიანობისთვის და ომში დაღუპულთა ოჯახის შვილები, შეზღუდული შესაძლებლობის მქონე პირთა , დევნილთა ოჯახის შვილები. აღნიშნული კატეგორიის მქონე პირთა შვილები საბავშვო ბაღებში 1 ივლისიდან 10 ივლისის ჩათვლით ჩაირიცხებიან. 15 ივლისიდან კი საბავშვო ბაღებში სოციალური სტატუსის გარეთ მყოფი აღსაზრდელების ჩარიცხვა დაიწყება. ბავშვები რეგისტრაციის რიგითობის მიხედვით ჩაირიცხებიან. ბათუმის საბავშვო ბაღებში ონლაინ რეგისტრაციის პროცესი მთელი წლის განმავლობაში მიმდინარეობს.