20, აპრილი 2017 20:01:00
ბათუმის ბულვარმა „სააღდგომო ფესტივალს“ უმასპინძლა. ღონისძიების ფარგლებში, ბულვარის კოლონადებთან ადგილობრივი საკონდიტრო კომპანიების მიერ დამზადებული პასკები გამოიფინა. შესაძლებელი იყო მათი ადგილზე დაგემოვნება და შეძენაც. გამოიფინა ორიგინალურად მოხატული სააღდგომო კვერცხები და სხვადასხვა თემატიკის სტენდები. მათ შორის გობელენისა და თექის ნამუშევრები. ფესტივალის პარალელურად ფოლკლორული და ქორეოგრაფიული ანსამბლების კონცერტიც გაიმართა, მასში მონაწილეობა მომღერალმა ვაჟა ტუღუშმა მიიღო. ღონისძიების განსაკუთრებული სტუმრები მიუსაფარი და შეზღუდული შესაძლებლობების მქონე ბავშვები იყვნენ. ფესტივალის დასასრულს მათ საჩუქრად სააღდგომო ნობათი გადაეცათ. „სააღდგომო ფესტივალი“ აჭარაში წელს პირველად გაიმართა. ბათუმის ბულვარის ადმინისტრაცია გეგმავს ღონისძიება ტრადიციად აქციოს.