სამთვიანი პაუზის შემდეგ, ავტოსკოლებმა სამუშაო პროცესი განაახლეს, თუმცა საყოველთაო პრევენციული ღონისძიებების დაცვა აქაც სავალდებულოა. ამ უკანასკნელის დაცვა სავალდებულოა მართვის მოწმობის მიღების მსურველებისთვისაც. მეტად რთული აღმოჩნდა გამოსაცდელთათვის გამოცდაზე პირბადის ტარება, რადგან როგორც ამბობენ, ნერვიულობას სუნთქვის უკმარისობაც დაემატა. პედაგოგები შემცირებულ მოსწავლეთა რიცხვზე, ავტოსკოლის მფლობელები კი შემცირებულ შემოსავალზე საუბრობენ.
მართვის მოწმობის მიღების მსურველებისთვის, მომსახურების მიღება ხელმისაწვდომი, ეტაპობრივად, 18 მაისიდან გახდა. შსს მომსახურების სააგენტომ გამოცდებზე ჯერ ის პირები დაუშვა, რომლებსაც თეორიული ნაწილი ჩაბარებული ჰქონდათ და პრაქტიკული გამოცდისთვის რეგისტრირებულნი პანდემიამდე იყვნენ. მსურველებს, სააგენტო სრული დატვირთვით, უკვე 1 ივნისიდან ემსახურება, შესაბამისად, სააგენტოსთან რიგები უკვე გაჩნდა. საყოველთაო პრევენციული ღონისძიებების დაცვა აქაც სავალდებულოა.
სამთვიანი პაუზის შემდეგ, შეზღუდვების მოხსნის პარალელურად, მუშაობა განაახლეს ავტოსკოლებმაც. განსხვავება ერთია, თუ კი აქამდე ჯგუფში 40-მდე მოსწავლე ჰყავდათ, დღეს ათზე მეტი პირის დაშვება ერთ საგაკვეთილო საათზე აკრძალული აქვთ. ავტოსკოლის მფლობელები ამბობენ, რომ ფინანსურ მხარეზე ეს ცუდად აისახება, თუმცა საგანგებო მდგომარეობის მოქმედების ვადაში, ონლაინ სწავლების დანერგვა მეტ-ნაკლებად შეღავათი აღმოჩნდა. ერთ-ერთი ავტოსკოლის პედაგოგი ამბობს, რომ ამ გზით თეორიული განათლება 60-მდე მოსწავლეს მიაწოდა.
პედაგოგებისთვის და მოსწავლეებისთვის, კიდევ უფრო რთული პრაქტიკული ნაწილის სწავლა აღმოჩნდა. იმის გამო, რომ პედაგოგს მოსწავლესთან და პირიქით პირბადის გამოყენება მოეთხოვება, მოსწავლეების უმრავლესობა ტარების სწავლას დამოუკიდებლად ცდილობს. გარდა იმისა, რომ სპეციალისტის გარეშე მოსწავლისთვის უნარების დაუფლება რთულია, მომხმარებლები დაკარგეს პრაქტიკული ნაწილის პედაგოგებმაც.
ორმაგ დაძაბულობაზე საუბრობენ გამოცდაზე გამსვლელი მოსწავლეებიც. ამბობენ, რომ განსაკუთრებით უჭირთ მობილიზება, როცა გამოუცდელობას და ნერვიულობას პირბადის ტარებით გამოწვეული სუნთქვის უკმარისობაც ემატება.
რაც შეეხება თეორიული გამოცდის ჩაბარებისთვის ჯავშანს, რიგები კვირას, დილის 9 საათიდან ახლდება.
77
s
s
s