24, დეკემბერი 2020 21:59:00
ბავშვის საფენები, ჰიგიენური საშუალებები და საკვები 15 პროცენტით გაძვირდა. პანდემიის პირობებში, საჭმელმა, ძირითადად, 4-5 ლარით მოიმატა, ზოგიერთი ბრენდის მოთხოვნად პროდუქტზე კი ნამატი 7 ლარამდეც ფიქსირდება. გაძვირდა ხილის ფაფებიც. ჩვილბავშვიანი ოჯახები ამბობენ, რომ ერთ შეკვრა საკვებში 28-დან 35 ლარამდე ეხარჯებათ, რაც ჩვილს 4-5 დღის განმავლობაში ჰყოფნის. გაძვირდა საფენებიც. საბოლოო ჯამში, მშობლებისთვის, ამ ორი აუცილებლად საჭირო პროდუქტის ყოველთვიური ხარჯი თვეში 350 -დან 400 ლარამდე მერყეობს.
სოფო შაინიძე 4 შვილის დედაა. უმცროსი შვიდი თვისაა. ამბობს, რომ აქამდე ბავშვისთვის საკვებს 26 ლარად ყიდულობდა. მას კვირაში ასეთი 2 შეკვრა სჭირდება. დღეისათვის ერთი კოლოფი საკვების ფასი 32 ლარს აღწევს, რაც ოჯახის ეკონომიკურ მდგომარეობაზე მკვეთრად, უარყოფითად, აისახა.
ბავშვის რძის ფხვნილთან ერთად, ფასი გაიზარდა ხილფაფებზეც. ძვირადღირებული საკვების შეძენის აუცილებლობამ კი უარყოფითი გავლენა იქონია ბერიძეების სამშვილიანი ოჯახის ბიუჯეტზე. უმცროსი 40 დღისაა და მხოლოდ ხელოვნურ კვებაზეა. სოციალურად დაუცველების ყოველთვიური შემოსავალი 250 ლარია. გვიყვებიან, რომ ეს თანხა მხოლოდ 1 ბავშვის გამოსაკვებადაც არაა საკმარისი.
გაძვირდა ბავშვის საფენებიც. ერთ შეკვრას დაახლოებით 7 ლარი დაემატა, შეფუთვაში კი რაოდენობამ იკლო. ამ შემთხვევაშიც მშობლები იაფფასიან პროდუქციას ყიდულობენ, თუმცა ეს მათთვის მაინც არ არაა შეღავათი.
ჩვილბავშვიანი ოჯახებისთვის ჰიგიენური საშუალებები და საკვები, რომ საგრძნობლად გაძვირდა ამის შესახებ სააფთიაქო ქსელებშიც საუბრობენ. ამბობენ, რომ ფასნამატი 15-დან 20 პროცენტამდე მერყეობს. ფარმაცევტები პროდუქციაზე ფასების მატებას, დოლარის მერყევ კურსს უკავშირებენ.
ჩვილბავშვიანი ოჯახებისთვის ამ ორი აუცილებლად საჭირო ყოველთვიური პროდუქციის ხარჯი 350 – 400 ლარს აღწევს, რაც საარსებო მინიმუმსაც საგრძნობლად აღემატება.