11, ნოემბერი 2021 21:37:00
გია ქარცივაძე, პირველი კაცია აჭარაში, ვინც დეკრეტული შვებულებით ისარგებლა. გადაწყვეტილება 2017 წელს მიიღო. მაშინ, როდესაც ორი მცირეწლოვანი შვილი ჰყავდა და მეუღლეს ბავშვების აღზრდაში ეხმარებოდა. კანონი კი, მას დეკრეტული შვებულების შესაძლებლობას ისევე აძლევდა, როგორც დედების შემთხვევაში ხდება.
ცოლის მშობიარობის შემდეგ, დეკრეტული შვებულების გამოყენებას აპირებს გიორგი მიქელაძე. ფიქრობს, რომ ბავშვის აღზრდაში მამის წვლილიც აუცილებელია. ტელეწამყვანი, დეკრეტში გასვლას მაშინ აპირებს, როდესაც ცოლის შვებულება ამოიწურება.
სტერეოტიპი, რომ „ბავშვის მოვლა კაცის საქმე არაა“ საზოგადოებაში დღემდე არსებობს. მოქალაქეების ნაწილმა არც ის, იცის, რომ ახალბედა მამას დეკრეტული შვებულების გამოყენების უფლება აქვს. შემთხვევით შერჩევითობის პრინციპით, გამოკითხული მოქალაქეების ნაწილი ფიქრობს, რომ ბავშვის აღზრდაში აქტიურად ჩართულობისთვის, მამამ, მსგავსი შესაძლებლობით, აუცილებლად უნდა ისარგებლოს, ნაწილს კი, კანონი, რომელიც წლებია არსებობს - არ მოსწონს.
604 დღე კერძო სექტორში, ხოლო 550 კალენდარული დღე, საჯარო სამსახურში. ამას კანონი არეგულირებს. ახალბედა მამებს, დეკრეტული შვებულების გამოყენება იმ შემთხვევაში შეუძლიათ თუ კი, დედები მუშაობენ. კანონმდებლობის მიხედვით ორივე მშობელს ერთად დეკრეტული შვებულების გამოყენების უფლება არ აქვს.
იმ შემთხვევაში, თუ კი, დედამ ორსულობის ან ფეხმძიმობის შემდგომ პერიოდში შვებულება არ გამოიყენა, 2016 წელს ამოქმედებული კანონის მიხედვით, ამ დღეების გამოყენებაც მამას შეუძლია.