11, ოქტომბერი 2017 20:06:00
დღევანდელი წვიმის შედეგად ბათუმში რეაბილიტირებული ქუჩების ნაწილი დაიტბორა. სანიაღვრე არხები წყალს ვერ ატარებს და ყოველი გაწვიმებისას ქუჩაში დგება. პუშკინისა და ლორიას ქუჩების კვეთაში წყლის დონე იმდენად დიდია, რომ ფეხით გადაადგილება ჭირს. მსგავსი სიტუაცია "მაცნეს" გადამღებმა ჯგუფმა ლერმონტოვის ქუჩაზეც გააფიქსირა. რატომ იტბორება რეაბილიტირებული ქუჩები გაწვიმებისას, კითხვა ბათუმის მერიაში უპასუხოდ დატოვეს და შპს "ბათუმის წყალში" გადაგვამისამართეს. ამ უკანასკნელის პრესსამსახურში კი გვითხრეს, რომ სამსახურში დღეს დატბორვის თაობაზე განაცხადი არ შესულა და რომ ისინი მხოლოდ სანიაღვრე არხების მოვლა-პატრონობაზე არიან პასუხსიმგებლნი. სისტემის გამტარუნარიანობაზე კი როგორც უწყებაში განმარტეს, ტენდერში გამარჯვებულ კომპანიას თავის დროზე უნდა ეზრუნა.