10, დეკემბერი 2018 20:03:00
მთავრობის თავმჯდომარე ოპოზიციაზე შურის ძიებას აპირებს. როგორ და რანაირად , რიჟვაძეს არ დაუკონკრეტებია. რეგიონის პირველი პირის გუშინ გაკეთებული განცხადება დღეს აქტიური განხილვის საგანი გახდა. ადრესატმა - აჭარის მეთაურის ნათქვამში მუქარა დაინახა. რა თქვა რიჟვაძემ და რა ქვეტექსტები ამოიკითხა მის სიტყვებში მესამე სექტორმა?
აჭარის მთავრობის თავმჯდომარემ პოლიტიკური ველის გასუფთავებასა და შურისძიებასთან დაკავშირებული განცხადება გუშინ, გააკეთა. მან არასამთავრობო ორგანიზაცია ,,სამართლიანობა და დემოკრატიული პრინციპები - XXI საუკუნის“ ხელმძღვანელი აჭარელი ხალხის ღირსების შელახვაში დაადანაშაულა.
თორნიკე რიჟვაძის გაღიზიანება ჯელალ ქიქავას „TV პირველის“ ეთერში გამოგაკეთებულ განცხადებას მოჰყვა.
ჯელალ ქიქავა მთავრობის მეთაურის განცხადებას მუქარად აღიქვამს, ის არასამთავრობო სექტორს და სახალხო დამცველს ფაქტის შეფასებისკენ მოუწოდებს. ქიქავა აჭარის მთავრობის თავმჯდომარისგან საჯაროდ ბოდიშის მოხდას მოითხოვს.
„საქართველოს ახალგაზრდა იურისტთა ასოციაციაში“ მთავრობის თავმჯდომარის განცხადებას ძალადობის წახალისებად აფასებენ. ანნა მდინარაძეს მიაჩნია, რომ სგავსი პოზიციის დაფიქსირებისას მთავრობის მეთაურს მეტი პასუხისმგებლობა მართებს.
,,თავისუფალ ჟურნალისტთა სახლის“ ხელმძღვანელს მიაჩნია, რომ მთავრობის თავმჯდომარის მხრიდან მსგავსი განცხადება შესაძლოა ძალადობის წახალისებად იქნას აღქმული და ჯელალ ქიქავა აგრესიის ადრესატი გახდეს.
ძალადობის წახალისებად აღიქვეს თორნიკე რიჟვაძის განცხადება სახალხო დამცველის აპარატშიც. ნინო ლომჯარიას განმარტებით, მისი წარმომადგენლები ფაქტს შეისწავლის, რის შემდეგად აპარატის პოზიცია გახდება ცნობილი.
აპირებს თუ არა ჯელალ ქიქავასთვის საჯარო ბოდიშის მოხდას აჭარის მთავრობის თავმჯდომარე ამ ეტაპზე უცნობია, გუშინდელ განცხადებასთან დაკავშირებით რეგიონისპირველ პირს დამატებითი განმარტება არ გაუკეთებია.