12, იანვარი 2017 11:19:00
საფეხბურთო სტადიონის მშენებლობა ბათუმში მიმდინარე წელს დაიწყება. პირობას აჭარის მთავრობა იძლევა. თანამედროვე სტანდარტების, 30 000 მაყურებელზე გათვლილი სტადიონი ყოფილი მანქანათმშენებელი ქარხნის ტერიტორიაზე უნდა აშენდეს. რამაზ ბოლქვაძის თქმით, პროექტს ექსპერტიზა უტარდება, რის შემდეგაც რეგიონის ფინანსთა და ეკონომიკის სამინისტრო მშენებლობისთვის ტენდერს გამოაცხადებს. სამუშაობის ნაწილი წლის ბოლოსთვის უნდა დასრულდეს. სამუშაოებს კომპანია „ბაჰადირ ქულ არქითექსი“ განახორციელებს. სტადიონის არქიტექტორი ერჰან ილიჯალია.
სტადიონის მშენებლობას უკვე რამდენიმე წელია ითხოვს „ერთიანი ნაციონალური მოძრაობა“, თუმცა პარტიაში მოედნისთვის გამოყოფილი ტერიტორია არ მოსწონთ. გია აბულაძის განცხადებით, აბუსერიძის ქუჩაზე მსგავსი მოცულობის და დატვირთვის ნაგებობა ქალაქში დამატებით საცობებს შექმნის.
სტადიონის მშენებლობას ითხოვენ ბათუმელებიც. საზოგადოების ნაწილმა საქართველოს მთავრობის სახელზე პეტიცია მოამზადა. ხელმომწერების მთავარი მოთხოვნა ქალაქში სტადიონის მშენებლობის დაწყებაა. ისინი მთავრობისგან კონკრეტული სამუშაოების დაწყებას მოითხოვენ.
ბათუმის ცენტრალური საფეხბურთო მოედანი 1935 წელს აშენდა. სტადიონი 18 000 მაყურებელზე იყო გათვლილი. ობიექტი 2006 წელს დაინგრა და ტერიტორიაზე სასტუმრო "კემპინსკის" მშენებლობა დაიწყო.