22, მარტი 2017 20:03:00
„მწვანე ალტერნატივა“ საქართველოს პარლამენტის წინააღმდეგ. საკონსტიტუციო სასამართლოს პირველმა კოლეგიამ მორიგი საკონსტიტუციო სარჩელის არსებითი განხილვა დაიწყო. დავის საგანს „წიაღის შესახებ“ საქართველოს კანონის 29-ე მუხლის ის ჩანაწერი წარმოადგენს, რომლის თანახმადაც „დაუშვებელია სახელმწიფო საინფორმაციო ფონდებში შეტანილი ინფორმაციის გაცემა სხვა იურიდიულ და ფიზიკურ პირზე ინფორმაციის მესაკუთრის თანხმობის გარეშე“. მოსარჩელე მიიჩნევს, რომ ეს სიტყვები წინააღმდეგობაშია კონსტიტუციის 37-ე და 41-ე მუხლების რიგ პუნქტებთან, რამდენადაც მოქმედი ნორმა ზღუდავს სრული, დროული და ობიექტური ინფორმაციის მიღებას გარემოს მდგომარეობის შესახებ, გარემოს შესახებ ინფორმაცია კი სახელმწიფო, პროფესიულ ან კომერციულ საიდუმლოებას არ განეკუთვნება.