23, იანვარი 2017 08:12:00
„ტვ 25“-ის დირექტორმა არხზე მიმდინარე პროცესებზე განცხადება გააკეთა. მურთაზ ფრანგულაშვილი არხის საინფორმაციო სამსახურის ხელმძღვანელის თანამდებობიდან წასვლის თავის ვერსიაზე საუბრობს. მაუწყებლის დირექტორს ირინა ყურუას მიერ არხიდან წასვლის მიზეზად დასახელებული არგუმენტები არასარწმუნოდ მიაჩნია. მურთაზ ფრანგულაშვილი დარწმუნებულია, რომ ყოფილი თანამშრომლის გადაწყვეტილება სხვა არხიდან მიღებულ შეთავაზებას უკავშირდება. ფრანგულაშვილი ამტკიცებს, რომ საინფორმაციო სამსახურის მუშაობის ფორმატი ჯერ გადაწყვეტილი არ არის, თუმცა ადასტურებს, რომ ყურუასთან განიხილავდა რამდენიმე ალტერნატიულ მოდელს, რომლის მიხედვითაც ახალი ამბები ოპტიმალური ადამიანური და ფინანსური რესურსით უნდა მომზადებულიყო, შემდეგ კი შერჩეული ვარიანტი მედიაექსპერტებთან შეჯერებულიყო. თავად ირინა ყურუა სხვა მედიასაშუალებიდან შეთავაზებას უარყოფს და ირწმუნება, რომ მისი გადაწყვეტილება მხოლოდ საინფორმაციო სამსახურის მუშაობაში დაგეგმილ ცვლილებებს უკავშირდება.