12, ოქტომბერი 2018 20:04:00
ინკლუზიური ტურიზმის განვითარების მიზნით ბათუმში მუზეუმების ადაპტირება იწყება. განათლების სამინისტროს 4 პროექტი უკვე შეძენილი აქვს. რამდენი ლარი დაიხარჯება პანდუსების მოსაწყობად და როდის დასრულდება ინფრასტრუქტურული სამუშაოები?
21 წლის არქიტექტორი ხელოვნების მუზეუმის შენობაში დამოუკიდებლად შესვლას ვერ ახერხებს. მიზეზი კი ისაა, რომ მუზეუმი მისი არსებობის 20 წლის მანძილზე სპეციალური საჭიროების მქონე პირებისთვის ადაპტირებული არასდროს ყოფილა.
აჭარის განათლების კულტურისა და სპორტის სამინისტრო, ინკლუზიური განვითარებისა და კულტურული დაწესებულებების ინფრასტრუქტური გაუმჯობესების მიზნით, 2019 წლიდან ხარიტონ ახვლედიანის , ხელოვნების, რელიგიისა და მემედ აბაშიძის მუზეუმების ადაპტირებას იწყებს. დაწესებულებები სპეციალური საჭიროებების მქონე პირებისთვის ინფრასტრუქტულად სრულიად ხელმისაწვდომი იქნება.
შენობების ადაპტირებას მიესალმება მუზეუმების გაერთიანების დირექტორი. თამარ ორაგველიძის თქმით, ეს ხელს შეუწყობს ინკლუზიური ტურიზმის განვითარებას.
მუზეუმების ადაპტირებისთვის პროექტები უკვე შეძენილია. წელს ძმები ნობელებისა და ილია წავჭავაძის მუზეუმების შენობის რეაბილიტაცია დასრულდება, რაც ინფრასტრუქტურის გაუმჯობესებასთან ერთად ადაპტირებული გარემოსაც გულისხმობს. ბათუმში ამ ეტაპისთვის პანდუსი მხოლოდ არქეოლოგიური მუზეუმს აქვს.