13, დეკემბერი 2018 20:34:00
სახელმწიფოსგან მივიწყებული სოფელი, რომელიც დაცლის პირასაა. მარტოხელა მოხუცი, რომელიც გარესამყაროს წლებია მოწყვეტილია. ჩაქვისთავში მცხოვრებლები ავარიული გზის შეკეთებას ითხოვენ.
მალხაზ გორგილაძეს 3 კილომეტრიანი მონაკვეთის გავლა ყოველდღიურად ფეხით უწევს. მარტოხელა კაცი თავს ბოსტნეულის რეალიზაციიდან მიღებული თანხით ირჩენს. მძიმე ტვირთის ტარება კი ხელით უწევს. სახლი, სადაც ის ცხოვრობს გარესამყაროს წლებია მოწყვეტილია. ავარიულ გზაზე გადაადგილება მხოლოდ ფეხითაა შესაძლებელი.
უიმედოდ დარჩენილი მალხაზ გორგილაძე მძიმე რეალობას ოთხფეხა მეგობრებთან ერთად ებრძვის. მარტოხელას შემოსავლის წყარო მხოლოდ სოფლის მეურნეობაა. სოფელში, სადაც ცხოვრობს ოთხი ოჯახია შემორჩენილი. როგორც თავად ამბობს, მეზობლები ხშირად ეხმარებიან.
ჩაქვისთავში მცხოვრები ოთხი ოჯახი თვლის, რომ ხელისუფლებისგან მივიწყებულია. ისინი პოლიტიკოსებს მხოლოდ წინასარჩევნოდ ახსენდებათ, სწორედ მაშინაა უხვი დაპირებებიც. თუმცა მძიმე რეალობა არჩევნებში გამარჯვების შემდეგ უცვლელია.
ქობულეთის მერიაში ვერ აკონკრეტებენ როდის დაიწყება გზის რეაბილიტაცია. ირკვევა, რომ ჩაქვისთავში მხოვრებლების პრობლემები მუნიციპალიტეტის 2019 წლის პრიორიტეტებში ვერ მოხვდა. თუმცა უწყებაში ამბობენ, რომ საავტომობილო გზას ზედაპირულად მოაწესრიგებენ.
ჩაქვისთავში წლების წინ 50-მდე ოჯახი ცხოვრობდა. აქ ამბობენ, სოფლიდან მიგრაცია რთულ რელიეფურ და კლიმატურ პირობებს უკავშირდება.