03, აპრილი 2017 20:09:00
ადვოკატი თენგიზ კახიძე აჭარის პოლიციის დეპარტამენტის ხელმძღვანელს მიმართავს. ადვოკატი უწყების ხელმძღვანელისგან წერილობით დასტურს ითხოვს იმის შესახებ, მიმდინარეობს, თუ არა 11-12 მარტის მოვლენებზე გამოძიება სისხლის სამართლის კოდექსის 225-ე მუხლით, რომელიც ჯგუფური ძალადობის ორგანიზებას, ხელმძღვანელობას ან მასში მონაწილეობას ითვალისწინებს. ასევე გამოვლინდა თუ არა აღნიშნული ქმედების ორგანიზატორები, რადგან თენგიზ კახიძის მტკიცებით აქციის მეორე ნაწილი იყო დაგეგმილი და მართული. კახიძე ასევე აღნიშნავს, რომ მას ამის დამადასტურებელი არგუმენტებიც გააჩნია, თუმცა გამოძიების ინტერესებიდან გამომდინარე, ამ ეტაპზე მათი დასახელებისგან თავს იკავებს. შინაგან საქმეთა სამინისტროში ამბობენ, რომ საქმეზე გამოძიება მიმდინარეობს. დამატებითი კომენტარისგან კი უწყებაში თავი შეიკავეს.