20, იანვარი 2017 11:27:00
შვიდის ნაცვლად ერთი ჯუჯა და ისიც ფიფქიას გარეშე, ადამიანი ობობა, ბეტმენი და სხვები - ბათუმის ახალ ბულვარში ბავშვების საყვარელი მულტიპლიკაციის გმირები დიდი ხანია აღარ დგას. მათი ნაწილი გასულ წელს თოვლმა დააზიანა, ნაწილი კიდევ დაუდევრობით დაიმტვრა და სხვა. ფიგურები რამდენიმე დღეა ახალ ბულვარში, დაშლილი ამფითეატრის მიმდებარე ტერიტორიზე ისევ გამოჩნდა, თუმცა არა თვალსაჩინოებისა თუ გართობისთვის.
ბათუმის ბულვარის ადმინისტრაციაში განმარტავენ, რომ ორგანიზაციას საკუთარი საწყობი არ აქვს, ხოლო ადგილი, სადაც ამ დრომდე გამოუსადეგარ ნივთებს ინახავდნენ, კერძო საკუთარება იყო. შენობა რამდენიმე დღის წინ დაიშალა. ამბობენ, რომ ეს დგომარეობა დროებითია და ვიდრე საკუთარი საწყობი ექნებათ, ბულვარი ჩამოწერილი ნივთების დასაწყობებისთვის ალტერნატიული ფართის ძიებაშია.
რაც შეეხება თოჯინებს, მიმდინარე წელს მათ შეძენასაც აპირებენ, თუმცა ჯერ ბიუჯეტში ამისთვის თანხები არ მოიძებნება. ადმინისტრაციაში ამბობენ, რომ ტენდერში გამარჯვებულმა კომპანიამ პატრების საყვარელი მულტიპლიკაციური გმირები გამოცვალა, თუმცა წუნის გამო არ ჩაიბარეს და მასზე სასამართლო დავა გრძელდება. აქ დასაწყობებული თოჯინები სწორედ ეს დაწუნებული მასალაა.
როგორც მერიაში გვითხრეს, მუნიციპალიტეტს ერთადერთი საწყობი აქვს და გამოყოფს თუ ვერა მასში ბულვრის ჩამოწერილი ქონების შესანახად ადგილს, მას შემდეგ გადაწყვეტენ, თუ კი ბულვარისგან ოფიციალურ წერილს მიიღებენ.