როგორ აითვისა ბათუმმა სარეზერვო ფონდი, ანგარიში ინფორმაციის თავისუფლების განვითარების ინსტიტუტმა გამოაქვეყნა. კვლევის მიხედვით, ბათუმი, ვეყნის მასშტაბით მეორე ქალაქია, რომელმაც სარეზერვო სახსრები ყველაზე მეტად აითვისა, თუმცა კვლევაში ასევე აღნიშნულია, რომ პანდემიის მიუხედავად, თვითმმართველმა ქალაქმა 2020 წელს, 2019 წელთან შედარებიოთ, მაინც ნაკლები დახარჯა. ია გოლიაძემ იცის დეტალურად კვლევის შედეგები.
ბათუმი ქვეყნის მასშტაბით მეორე ქალაქია, რომელმაც 2020 წელს სარეზერვო ფონდიდან ყველაზე მეტი თანხა დახარჯა. მილიონ 250 ათასი ლარიდან თვითმმართველობამ პანდემიის პერიოდში 1,247,832 ლარი აითვისა. გაწეული ხარჯების 87 პროცენტი, მოქალაქეთა მატერიალურ დახმარებას მოხმარდა. კვლევას „ინფორმაციის თავისუფლების განვითარების ინსტიტუტი“ ავრცელებს.
მიუხედავად კორონავირუსის პანდემიით შექმნილი მდგომარეობისა, 2020 წელს ბათუმის მერიის სარეზერვო ფონდიდან გაწეული ხარჯები 140 ათასი ლარით ნაკლებია 2019 წლის ხარჯზე. მესამე სექტორში ამბობენ, რომ ბათუმის სარეზერვო ფონდის განკარგვის ტენდენცია მუნიციპალიტეტში არსებულ ეპიდემიოლოგიურ სიტუაციასთან შესაბამისობაში არ იყო.
რატომ არ გამოიყენა ბათუმის მუნიციპალიტეტის მერიამ სარეზერვო ფონდით გათვალისწინებული ხარჯები სრულად? ამ კითხვაზე პასუხი ვერ მივიღეთ, რადგან უწყებაში ჩვენს სატელეფონო ზარებს დღეს არ უპასუხეს.
IDFI-ის მიერ 64 მუნიციპალიტეტიდან მოთხოვნა სარეზერვო ფონდების შესახებ უპასუხოდ დატოვა 9 მუნიციპალიტეტმა. მათ შორის ერთ-ერთია შუახევის მერია. რატომ არ მიაწოდა უწყებამ საჯარო ინფორმაცია მესამე სექტორს? მერი,ომარ ტაკიძე, ჩვენთან სატელეფონო საუბრისას მსგავს ფაქტს ვერ იხსნებს.
სარეზერვო ფონდების მიზანს წლის განმავლობაში წარმოქმნილი გაუთვალისწინებელი ხარჯების დაფარვა წარმოადგენს, ისეთის, როგორიცაა სტიქიური უბედურებები, ეპიდემიები, ეკოლოგიური და სხვა სახის კატასტროფები. 2020 წელს კოვიდ-19 ვირუსის პანდემიით შექმნილი მდგომარეობა, სარეზერვო ფონდებიდან ვირუსთან ბრძოლისთვის გარკვეული ღონისძიებების დაფინანსების საჭიროებას წარმოშობდა. ოპოზიციაში ამბობენ, რომ მთავარი პრობლემა, რაც ამ მიმართულებით არსებობს, თანხების უმისამართო ხარჯვა და ამომრჩევლის მოსყიდვაა.
IDFI-მ კვლევის ფარგლებში 54 მუნიციპალიტეტის მიერ სარეზერვო ფონდის რესურსით გაწეული ჯამში 14.7 მილიონი ლარის ოდენობის ხარჯების შესახებ ინფორმაცია გაანალიზა. 2020 წელს, 14 მილიონ 700 ათასი ლარის 63% 4 ყველაზე დიდი ქალაქის ბიუჯეტის სარეზერვო ფონდზე მოდის: თბილისზე, ბათუმზე, რუსთავსა და ქუთაისზე.