01, დეკემბერი 2021 20:18:00
ახლა კი გაგაცნობთ გოგოს, რომელიც 11 წლისაა და უკვე 8 წელია ხატავს. ნინი კონცელიძის პეიზაჟებმა და ნატურმორტებმა არაერთ კონკურსზე მოწონება დაიმსახურა და შესაბამისად, ათობით სიჰგელისა და ჯილდოს მფლობელი გახდა. მოზარდს სამომავლოდ დიდი გეგმები აქვს. უნარ-ჩვევებისა და ნიჭის განვითარებას სამხატვრო სკოლაში სწავლის გაგრძელებით აპირებს. ია გოლიაძე გიამბობთ
11 წლის ნინი თითქმის 8 წელია ხატავს. ხატავს განსაკუთრებული მონდომებით. ფუნჯს ხელში განწყობების შესაბამისად იღებს. დღეს ზღვის პეიზაჟის შექმნა გადაწყვიტა. იწყებს კონტურებით. ამას დაახლოებით 15 წუთი სჭირდება. შემდეგი ნაბიჯი კი გუაშის საღებავებით ფერთა გამის გამოყვანაა. ამბობს, რომ ჯერ ვერ გადაწყვიტა და სახელს მოგვიანებით შეარჩევს. ნახატის სრულყოფას საათნახევარი მოუნდა.
ძირითადად პეიზაჟებს და ნატურმორტებს ხატავს. დღემდე ასამდე ნამუშევრის სრულყოფა მოასწრო. უნდა, რომ დიზაინერი გამოვიდეს, რადგან ხატვა ყველაზე ახლოს ამ მიმართულებასთანაა.
პატარა ხელოვანის ნამუშევრებმა არაერთ კონკურსზე მოწონება დაიმსახურა, შესაბამისად მოზარდი უკვე ათეულობით სიგელის მფლობელია. სახლში, ამ ყველაფრისთვის, ცალკე კუთხეა გამოყოფილი.
ძირითადად საღამოობით ხატავს, მაშინ, როდესაც მეცადინეობას ასრულებს. პროცესს 2-3 საათს ანდომებს. ყველა ნახატი ერთნაირად უყვარს, რომელიმეს გამოყოფა უჭირს. ფავორიტი მხატვარი ლეონარდო და ვინჩია.
ნინის მიზანი ნიჭის განვითარებაა, ხელოვანი მოზარდის სამომავლო გეგმა კი - სამხატვრო სკოლაში სწავლის გაგრძელება. დაგვპირდა, რომ წარმატებული დიზაინერის ამპლუაში, სურვილების რეალობად ქცევის გზებზე პირველად ჩვენ მოგვიყვება.