25, ოქტომბერი 2017 14:06:00
საკონსტიტუციო სასამართლო დღეს ასრულებს არსებით განხილვას საქმეზე - სახალხო დამცველი პარლამენტის, შსს-ს და ჯანდაცვის სამინისტროს წინააღმდეგ. მოსარჩელე იმ რეგულაციებზე დაობს, რომელთა მიხედვითაც, განისაზღვრება ნარკოტიკული საშუალების მოხმარებასთან დაკავშირებული სამართალდარღვევის დადგენის წესი. კერძოდ, მოსარჩელე განმარტავს, რომ ამგვარი ფაქტის დადგენის მიზნით პირის გამოსაკვლევად წარდგენა წინასწარ სასამართლო ნებართვას არ საჭიროებს, შეზღუდულია სამართალდამცავი ორგანოს წარმომადგენლების მიერ განხორციელებული ქმედებების სასამართლო კონტროლიც. გარდა ამისა, გასაჩივრებული ნორმები, ნარკოლოგიური გამოკვლევის მიზნით ადამიანის პირადი თავისუფლების შეზღუდვასაც ითვალისწინებენ, მიუხედავად იმისა დგას თუ არა ამის აუცილებლობა. სახალხო დამცველი მიიჩნევს, რომ ამ და სხვა გარემოებების გათვალისწინებით, სახეზეა ადამიანის უფლებათა დარღვევის მაღალი რისკები. საქმეს პირველი კოლეგია განიხილავს.