06, თებერვალი 2017 11:23:00
სასოფლო-სამეურნეო ინსტიტუტის შენობა გაიყიდა. აჭარის ფინანსთა და ეკონომიკის სამინისტროს მიერ გამოცხადებულ პირობიან აუქციონზე 8 151 კვ.მ. შენობა და მასზე მიმაგრებული 13 640 კვ.მ. არასასოფლო-სამეურნეო დანიშნულების მიწის ფართობი სავარაუდოდ, ბიძინა ივანიშვილთან დაკავშირებულმა კომპანიამ – „ბიზნეს დეველოპმენტმა“ შეისყიდა. 4 მილიონ 500 000 ლარად შეფასებულ ქონებაზე მხოლოდ ერთი ბიჯი გაკეთდა. შედეგად 4 მილიონ 600 000 ლარად გასხვისდა. „ბიზნეს დეველოპმენტი “ გასხვისებული ქონების მიმდებარედ მრავალფუნქციურ ობიექტს უკვე აშენებს. თანხა ქონების ახალმა მეპატრონემ დღეიდან 30 დღის ვადაში უნდა ჩარიცხოს, საიდანაც პირობების მიხედვით 3 მილიონი ლარი ბათუმის სახელმწიფო უნივერსიტეტს უნდა ჩაერიცხოს. რაც შეეხება უნივერსიტეტისთვის დაპირებულ სხვა ქონებას, აჭარის ფინანსთა და ეკონომიკის სამინისტროში აცხადებენ, რომ მეტაქსას ქუჩაზე სტუდენტთა საერთო საცხოვრებლისთვის ფართს მას შემდეგ გადაცემენ, რაც სარემონტო ხარჯთაღრიცხვა მომზადდება, ლეონიძის ქუჩაზე მიწის ნაკვეთის გადაცემისთვის ტერიტორიის დაყოფა მიმდინარეობს.