27, თებერვალი 2017 20:31:00
ქობულეთის მოსახლეობა ცეცხლაურის ნაგავსაყრელის მშენებლობის ფარგლებში მიღებული კომპენსაციის გაზრდას ითხოვს. აგილობრივთა ნაწილი დღეს „ნაციონალური მოძრაობის“ წევრ ელგუჯა ბაგრატიონთან ერთად აჭარის ფინანსთა და ეკონომიკის სამინისტროში შეხვედრაზე იმყოფებოდა. შპს ,,ჰიგიენას“ ტექნიკური დირექტორის განცხადებით, მოსახლეობას განსახლების გეგმით გათვალისწინებული თანხები უკვე აღებული აქვს. ელგუჯა ბაგრატიონმა განმარტა, რომ აღნიშნულ საკითხთან დაკავშირებით, ფინანსთა მინისტრს პარასკევს ფრაქცია ,, ნაციონალური მოძრაობის“ სხდომაზე ელოდებიან. მანამდე მოსახლეობამ აქცია მთავრობის სახლთან გამართა და მთავრობის თავმჯდომარესთან შეხვედრას ითხოვდნენ. ცეცხლაურის ნაგავსაყრელის მშენებლობასთან დაკავშირებით, მიმდებარე ტერიტორიაზე მცხოვრებლებმა საკუთრების დათმობის სანაცვლოდ თანხა გასული წლის დეკემბერში აიღო, კვადრატულ მეტრზე 4 ლარი, თუმცა აცხადებენ, რომ მიღებული კომპენსაცია მიზერულია. აჭარის მთავრობის ადმინისტრაციულ ორგანოებთან ურთიერთობის დეპარტამენტის უფროსმა აქციის მონაწილეებს განუმარტა, რომ მთავრობის თავმჯდომარე ქალაქში არ იმყოფება.