ქორწინება ადრეულ ასაკში. ქობულეთის ერთ-ერთ სოფელში, ერთ სკოლაში, ბოლო ერთი წლის განმავლობაში 2 შემთხვევა დაფიქსირდა. ოჯახი არასწრულწლოვნებმა 15 წლის ასაკში შექმნეს. რატომ დუმდა სკოლის დირექტორი დანაშაულზე? და რა რეაგირებას მოახდენენ განათლების და შინაგან საქმეთა სამინისტროები ფაქტებზე?
ეს ის საკლასო ოთახი და მერხია, სადაც არასრულწლოვანი გოგო გათხოვებამდე სწავლობდა. მე-11 კლასის მოსწავლე, თანასოფლელზე დაახლოებით ერთი თვის წინ გათხოვდა. 15 წლის გოგოს დამრიგებელი ირწმუნება, რომ მოზარდი სკოლის დაწყებამდე დაოჯახდა. მან ფაქტის შესახებ ინფორმაცია დირექტორს შეატყობინა, თუმცა პედაგოგი, რომელიც სამოქალაქო განათლებას ასწავლის მას შემდეგ განვითარებული მოვლენებით აღარ დაინტერესებულა.
საპირისპიროს ამტკიცებს დირექტორი. ირწმუნება, რომ სკოლის ადმინისტრაციისთვის ინფორმაცია მას შემდეგ გახდა ცნობილი, რაც არასრულწლოვანი მობილობით სხვა სკოლაში გადავიდა. პროცედურები სავარაუდოდ მას შემდეგ დაიწყო, როცა გოგო უკვე ქორწინებაში იყო. დირექტორს შესაბამისი უწყებებისთვის ინფორმაცია არ მიუწოდებია. 15 წლის გოგოს, ქორწილი გუშინ იყო, რომელშიც სკოლის დირექტორიც იმყოფებოდა. არასრულწლოვანის დედაც ამავე სკოლაში ასწავლის და დირექტორი ქორწილში სწორედ კოლეგის მიპატიჟების გამო წავიდა.
ცნობისთვის ამავე სკოლაში, ამავე კლასიდან გასული წლის დეკემბერში კიდევ ერთი არასრულწლოვანი გათხოვდა - დირექტორს რეაგირების მოხდენა საჭიროდ არც ამ შემთხვევაშიც ჩაუთვლია.
ქობულეთის რესურსცენტრში ირწმუნებიან, რომ ინფორმაციას დღემდე არ ფლობდნენ. აქ გვითხრეს, რომ სოციალური მომსახურების სააგენტოს და შინაგან საქმეთა სამინისტროს რეაგირებისთვის უკვე მიმართეს. რესურსცენტრში ცალსახად აცხადებენ, რომ მსგავსი ფაქტის დაფიქსირების შემთხევაში დირექტორი ვალდებულია სამინისტროს მომხდარის შესახებ აცნობოს.
მომხდარში სკოლის ადმინისტრაციის ბრალეულობას ხედავენ მესამე სექტორში, სადაც აცხადებენ, რომ პრევერნციისთვის დროული რეაგირებაა საჭირო.
თემაზე სატელევიზიო კომენტარი აჭარის განათლების მინისტრმა არ გააკეთა. უწყების პოზიცია პრესსამსახურის თანამშრომელმა გაახმოვანა, რომელმაც გვითხრა, რომ ახლა საგამოძიებო ორგანოს გადაწყვეტილებას ელოდებიან.
საქმე ისაა, რომ წყვილის ჯვრისწერის ცერემონიალი ისე გაიმართა, რომ არასრულწლოვანი გოგოს სასულიერო პირისთვის პირადობის დამადასტურებელი დოკუმენტაცია არ წარუდგენია. საპატრიარქოში გვითხრეს, რომ ახლადდაქორწინებულებს სიტყვაზე ენდენ. ფაქტს მეუფე შეისწავლის, რის შემდეგაც გახდება ცნობილი გაბათილდება თუ არა ჯვრისწერის მოწმობა. მომხდარზე შინაგან საქმეთა სამინისტრომ გამოძიება სისხლის სამართლის კოდექსის 140-ე მუხლით მიმდინარეობს, რაც 16 წლამდე მიუღწეველთან პირთან სექსუალურ შეღწევას გულისხმობს.
1
s
s
s