06, დეკემბერი 2018 20:03:00
არასრულად შევსებული ქონებრივი დეკლარაცია. კვლევის შედეგები მესამე სექტორმა გამოაქვეყნა, ჩვენმა რეპორტიორმა კი თვალი დოკუმენტებს გადაავლო. აღმოჩნდა, რომ საკუთარი ქონება სახელმწიფოს ბათუმის საკრებულოსა და მერიის 8 წევრმა დაუმალა.
სოფიო მიქელაძე, ლევან მამინაიშვილი, ირაკლი პატარიძე, ზურაბ ნაკაიძე, ომარ მახარაძე, ნატალია ძიძიგური, ნერიმან ცინცაძე და მირდატ ქამადაძე - ბათუმის მერიისა და საკრებულოს ის თანამშრომლები არიან, რომლებმაც ქონებრივი დეკლარაცია არასრულად შეავსეს. კვლევის შედეგები „საერთაშორისო გამჭვირვალობა საქართველომ“ გამოაქვეყნა. გამოიკეთა, რომ 6 შემთხვევაში, საჯარო მოხელეებმა დეკლარაციაში მათი ოჯახის წევრების ქონება სრულად არ ასახეს. ორს კი ინტერესთა შეუთავსებლობა აქვს, რადგან ამ დრომდე წილებს ფლობენ კერძო კომპანიებში.
კვლევის მიხედვით, ბათუმის საკრებულოს საფინანსო და ეკონომიკური განვითარების კომისიის თავმჯდომარეს დეკლარაციაში მითითებული არ აქვს სამეწარმეო საქმიანობა. საკრებულოს თანამდებობის პირი შპს „ბიოლა ჯორჯიას” დირექტორია. ზურაბ ნაკაიძის განცხადებით, არ ჰქონდა ინფორმაცია, რომ იგი დღემდე კომპანიის დირექტორის პოზიციას ინარჩუნებდა, რადგან შპს 2011 წლიდან ფუნქციონირება შეწყვეტილი აქვს.
„საერთაშორისო გამჭვირვალობა საქართველოს“ მიერ გამოქვეყნებულ კვლევას უსაფუძვლოს უწოდებს ფრაქცია „ქართული ოცნება - კონსერვატორების” თავმჯდომარე. ნატალია ძიძიგურს, დეკლარაციაში არ მიუთითებია მეუღლის, იაგო ტაკიძის საკუთრებაში არსებული 77.6 კვ.მ სხვენი, რომელიც ბათუმში, ხიმშიაშვილის ქუჩაზე მდებარეობს. დეკლარაციაში არც იაგო ტაკიძის 2.38%-იანი წილია ასახული, საუბარია შპს რესპუბლიკურ კლინიკურ საავადმყოფოს აქციებზე.
საკრებულოს კიდევ ერთ წევრს ნერიმან ცინცაძეს, რომელიც ასევე ფრაქცია „ქართული ოცნება - კონსერვატორების” თავმჯდომარის მოადგილეა ქონებრივ დეკლარაციაში აღნიშნული არ აქვს, რომ მეუღლე, როსტომ ცინცაძე 6.67% წილს ფლობს შპს „კანისა და ვენსნეულებათა სამედიცინო ცენტრში”. ფაქტს ნერიმან ცინცაძე ასე განმარტავს:
საჯარო მოხელებს შორის, მირდატ ქამადაძე ერთადერთია ოპოზიციდან, რომელსაც 2017 წლის 20 დეკემბერს შევსებულ დეკლარაციაში მითითებული აქვს, რომ შპს „ჯი ელ ჯის” 40%-იანი წილის ფლობიდან, 2016 წელს შემოსავლის სახით 33 000 ლარი აქვს აღებული. ქამადაძეს მიაჩნია, რომ წილს კანონის თანახმად ფლობს და არც სამომავლოდ აპირებს მის დათმობას.
"საერთაშორისო გამჭვირვალობა საქართველოს" წარმომადგენლები მიიჩნევენ, რომ თანამდებობის პირების ქონებრივი მდგომარეობის შესახებ დეკლარაციების შემოწმება კორუფციასთან ბრძოლის ერთ-ერთი უმნიშვნელოვანესი ინსტრუმენტია, შესაბამისად საჯარო სამსახურის ბიუროსთან ერთად, ბათუმის საკრებულოსა და მერიას კვლევაში აღნიშნული პირების ქონებრივი მდგომარეობის დეკლარაციების შესწავლასა და შესაბამისი რეაგირების მოხდენისკენ მოუწოიდებს.