თუნთულ ბებო. ქალი, რომელსაც ყვავილების ბაზრობაზე ყველა იცნობს. 74 წლის მოხუცი, საკუთარ ეზოში მოყვანილი ყვავილების რეალიზაციას უკვე 50 წელია ეწევა. როგორია მეყვავილე ქალის ყოველდღიურობა, თეო ფუტკარაძე გაგვაცნობს.
თუნთულ ბებოს დილა, ბათუმში, ყვავილების ბაზრობაზე იწყება. 74 წლის მოხუცი, ამ საქმეს 50 წელია ემსახურება. ბაზრობაზეც უხუცესია და იგი მეყვავილე ბებოს სახელითაა ცნობილი. მარტო სიარულს ვეღარ ახერხებს, ამიტომ, ყვავილების დახლთან მიტანაში რძალი ეხმარება. იმის გამო, რომ ასაკშია, სავაჭროდ, ყოველი დღის ნაცვლად, ახლა უკვე კვირაში რამდენჯერმმე გამოდის.
მოხუცი გვიყვება, რომ ყვავილებით ვაჭრობა, მცენარეების სიყვარულმა შთააგონა. ამბობს, რომ სახლში, სხვადასხვა, ნერგი გაამრავლა და მცირე ბიზნესიც მაშინ დაიწყო. მას შემდეგ, მოხუცი საკუთარი ხელით მოყვანილი ყვავილების რეალიზაციას ახდენს.
მიუხედავად იმისა, რომ იგი პენსიას უკვე 14 წელია იღებს, მუშაობისთვის თავი მაინც არ დაუნებებია. ამბობს, რომ სახელმწიფო პენსია ყოფაცხოვრებისთვს საკმარისი არ არის. მისი თქმით, შვილიშვილებისთვის საკუთარი გამომუშავებული თანხით ნაყიდი ნუგბარი უფრო ტკბილია.
50 წლის განმავლობაში, მოხუცმა სავაჭრო ადგილი რამდენჯერმე გამოიცვალა, თუმცა, ამბობს, რომ ამის მუხედავად ერთგული მომხმარებლები მუდმივად მასთან მიდიან. სავაჭრო ადგილი მისთვის მეორე ოჯახივითაა. მეგობრებიც აქ ეგულება..
თუნთულ ბებო ამბობს, რომ მისთვის განსაკუთრებულად შემოსავლიანი, გაზაფხულია. პანდემია მის შემოსავალზეც მკვეთრად აისახა. სოფლად მცხოვრებ მოხუცს, ტრანსპორტის აკრძალვის გამო, მგზავრობა ტაქსით უწევდა, რაც დღეში, დაახლოებით, 20 ლარი უჯდებოდა. თუმცა, უქმე დღეები ახალი ნერგების გამრავლებისთვის ნაყოფიერი აღმოჩნდა.
თუნთულ ბებოს, თბილი და მზრუნველი ხელებით მოყვანილი ყვავილების შეძენა, ბათუმში, პლაზის მიმდებარე ტერიტორიაზე, ყვავილების ბაზრობაზე შეგიძლიათ.