"არანაირი პოლიტიკური ნიშნით დევნას აქ ადგილი არ აქვს" | ბათუმის დრამატული თეატრი

დრამატული

ფოტო: Georgian Travel Guide

მსახიობ თორნიკე ბარამიძის გათავისუფლებისა და თეატრში რეპრესიების დაწყების შესახებ გავრცელებული ინფორმაციის შემდგომ, ბათუმის დრამატული თეატრი იწრმუნება, რომ  მსახიობებს პოლიტიკური ნიშნით არ დევნიან. ოფიციალური განცხადება თეატრმა ფეისბუქ გვერდზე გააკეთა. დირექცია გუშინ გავრცელებულ ინფორმაციას„მტკნარ სიცრუეს“ უწოდებს და აცხადებს, რომ ეს მიზნად ისახავდა თეატრის ხელმძღვანელობის რეპუტაციის შელახვასა და საზოგადოების შეცდომაში შეყვანას. 

„ჩვენ ყოველთვის ვერიდებით შიდა პრობლემების საჯაროდ გამოტანას, მაგრამ ამჯერად ვალდებული ვართ საზოგადოებას ვაცნობოთ:

მსახიობის უპირველესი მოვალეობაა სპექტაკლების თამაში, რასაც წინ უძღვის დაძაბული და ხანგრძლივი რეპეტიციები.

ხშირად ყოფილა შემთხვევები, როცა მსახიობი მძიმე ავადმყოფობის ან სულიერი მდგომარეობის მიუხედავად მოდის თეატრში და თამაშობს სპექტაკლს, რათა არ გააწბილოს მაყურებელი. ეს ერთგვარი თავგანწირვა ამ პროფესიის თანმდევი ნაწილია, ამიტომაც იწვევს განსაკუთრებულ პატივისცემას. ასეთი მაგალითი ბევრია, როგორც ჩვენს თეატრში, ასევე სხვა თეატრებშიც. მაგრამ, როდესაც მსახიობი ორი კვირით ადრე შემოთვლის, რომ სიცხე აქვს და ორი კვირის შემდეგაც ავად იქნება, ამიტომ ვერ ჩამოდის სპექტაკლის სათამაშოდ, თან ამ დროის განმავლობაში მას შენიშნავენ სხვა ორგანიზაციის პიარ ღონისძიებაზე, ხოლო ის შემდგომ არ გამოცხადდება სპექტაკლში მონაწილეობის მისაღებად, თან ბოლო ორი თვის განმავლობაში ეს არ არის პირველი შემთხვევა და ამასთანავე მას არ წარმოუდგენია არავითარი სამედიცინო საბუთი, თეატრის ხელმძღვანელობა ვალდებულია გამოიყენოს მის მიმართ შინაგანაწესით და ხელშეკრულებით გათვალისწინებული მუხლი, რაც გულისხმობს ხელშეკრულების გაწყვეტას უვადო ან გარკვეული ვადით.

ასე მოხდა ამ შემთხვევაშიც და არანაირი პოლიტიკური ნიშნით დევნას აქ ადგილი არ აქვს.

ჩვენი თეატრის ნებისმიერ თანამშრომელს უფლება აქვს გამოხატოს თავისი აზრი თუ ქმედება ნებისმიერ პოლიტიკურ პროცესზე თეატრის გარეთ და ამის გამო მას არავითარი პასუხისმგებლობა არ ეკისრება. ჩვენი თეატრის სპექტაკლების განრიგი ორი თვით ადრე ქვეყნდება. ყველა მსახიობმა იცის როდის აქვს სპექტაკლი, ისიც იცის, რომ მისი მოხსნა არის თეატრისთვის მძიმე მორალური და ფინანსური ზიანის მომტანი. ამიტომ შემდეგაც თუ მსგავს მიზანმიმართულ თუ დაუდევრობის შედეგად დისციპლინურ გადაცდენებს ექნება ადგილი, თეატრის ხელმძღვანელობა იძულებული გახდება მიიღოს კანონით გათვალისწინებული შესაბამისი ზომები, თუ მსახიობი არ წარმოადგენს შესაბამის სამედიცინო ცნობას, რომ მის ჯანმრთელობას სპექტაკლის თამაშით საფრთხე ექმნება და გამოიწვევს შემდგომ გართულებებს,“ – წერია ბათუმის დრამატული თეატრის დირექციის მიერ გავრცელებულ განცხადებაში.

ცნობისთვის, გუშინ, 10 მარტს მსახიობმა ტიტე კომახიძემ დაწერა, რომ ბათუმის დრამატულ თეატრში რეპრესიები დაიწყო და გაათავისუფლეს მსახიობი თორნიკე ბარამიძე, მიუხედავად იმისა, რომ მას "საავადმყოფო ფურცელი ( ბიულეტენი ) აქვს გახსნილი".

ეს პირველი შემთხვევა არ არის, როდესაც ბათუმის დრამატულ თეატრს მსახიობები პოლიტიკური ნიშნით დევნაში ადანაშაულებენ. 

,

მეტის ნახვა