რუსულმა საკრუიზო ლაინერმა ბათუმის პორტი დაჩქარებულად, საქართველოს ჰიმნისა და პროტესტის ფონზე დატოვა

რუსულმა საკრუიზო ლაინერმა "ასტორია გრანდემ" ბათუმის პორტი დაჩქარებულად, საქართველოს ჰიმნისა და პროტესტის ფონზე დატოვა. მოქალაქეებმა, აქტივისტებმა და პოლიტიკური პარტიების წარმომადგენლებმა საზღვაო გზით რუსი ოკუპანტების შემოსვლა გააპროტესტეს.

"არა გარუსების პოლიტიკას! საქართველოს მთავრობას არ გაუვა გაარუსოს საქართველო და ქართველი ხალხი!" - აცხადებდნენ შეკრებილები.

აქციები თბილისსა და ბათუმში საკრუიზო ხომალდის შემოსვლის გამო ჩაინიშნა. ქვეყანაში გემით 800-ზე მეტი რუსი ტურისტი შემოვიდა, რომლებიც არ აღიარებენ კრემლის მიერ საქართველოს ტერიტორიების ოკუპაციას და ამტკიცებენ, რომ "აფხაზეთი საქართველოსგან გაათავისუფლეს".