დატბორილ და ავარიულ სახლებში, ბედის ანაბარა მიტოვებული მოსახლეობა "ოცნების ქალაქში"

ე. წ. ოცნების ქალაქი მმართველი გუნდის საპიარო თემაა. მაღალი ტრიბუნებიდან დიდი სიამაყით, არაერთხელ გაცხადებულა, რომ „ქართული ოცნების“ დამსახურებაა ე.წ. მუყაოს ქალაქის მოსახლეობის  ღირსეულ და უსაფრთხო გარემოში ცხოვრებაზე ზრუნვა. რამდენიმე ახლადაშენებული კორპუსის ფონზე კამერების წინ პოზირებაც პიარის ნაწილია. განსაკუთრებით, წინასაარჩევნოდ. თუმცა რეალურად,  ის ვინც 582 კაციან სიაში ვერ მოხვდა, დატბორილ და ავარიულ სახლებში,  ბედის ანაბარადაა მიტოვებული. მოსახლეობის ეს ნაწილი სიცოცხლისთვის საფრთხის შემცველ გარემოში ცხოვრობს და სამართალს ეძებს. ფრიდონ ხალვაშის 188- ში მდებარე ავარიულ კორპუსში მცხოვრებლები ხელისუფლებას, მინიმუმ, უსაფრთხო გარემოს შექმნას წლებია სთხოვენ.