ამ დილით მივიღე გადაწყვეტილება, შევიწყალო ლაზარე გრიგორიადისი | პრეზიდენტი

საქართველოს პრეზიდენტი სალომე ზურაბიშვილი ლაზარე გრიგორიადისს იწყალებს - ამის შესახებ თავად პრეზიდენტმა განაცხადა. მისივე თქმით, გადაწყვეტილებას ხელს პროცედურების გავლის შემდეგ, უახლოეს მომავალში მოაწერს.

"გადაწყვეტილება მივიღე დღეს დილით, 10 საათზე, არ დაველოდე არც არავის მოწოდებას. ასე რომ, ვერავინ ჩაითვლის ქულებს. მე ჩემი სინდისის წინაშე ჩავთვალე, რომ არ შეიძლება, ეს ახალგაზრდა 9 წლით დაისაჯოს. ხელი ჯერ არ მომიწერია, არის პროცედურები.

გადაწყვეტილება არის მიღებული ყველანაირი გამოთქმული აზრის გარეშე. ამაზე ვფიქრობდი რამდენიმე დღე, თუმცა სანამ არ იქნებოდა გამამტყუნებელი განაჩენი, მანამდე ვერაფერს გადავწყვეტდი", - აღნიშნა ზურაბიშვილმა "TV პირველთან" საუბრისას.

მარტის აქციებზე პოლიციელების ჯანმრთელობის ხელყოფისა და სახელმწიფო ქონების განადგურების ბრალდებით დაკავებული 21 წლის ლაზარე გრიგორიადისი სასამართლომ დამნაშავედ ცნო.

თბილისის საქალაქო სასამართლოს მოსამართლის, ზვიად შარაძის გადაწყვეტილებით, ლაზარე გრიგორიადისს თავისუფლების 9 წლით აღკვეთა მიესაჯა.