ირაკლი კობახიძე ქვეყნის ევროპელ პარტნიორებს მუქარაში ადანაშაულებს

ირაკლი კობახიძე ქვეყნის ევროპელ პარტნიორებს მუქარაში ადანაშაულებს. პრემიერ-მინისტრი  განცხადებას ავრცელებს და ისევ "გლობალური ომის პარტიაზე" საუბრობს. აცხადებს, რომ  ხანგრძლივი შანტაჟის ფონზეც კი, გამაოგნებელი იყო მუქარა, რომელიც ერთ-ერთ ევროკომისართან სატელეფონო საუბრისას გაჟღერდა. მთავრობის მეთაური ამტკიცებს, რომ პარალელი რობერტ ფიცოს მკვლელობის მცდელობასთან გაავლეს და ჩამოუთვალეს მთელი რიგი ზომები, რომლებიც დასავლელმა პოლიტიკოსებმა გამჭვირვალობის კანონზე ვეტოს დაძლევის შემდეგ შეიძლება მიიღონ . ქართულ ოცნებაში პრემიერის განცხადებას, რომ ევროკომისარი "დაემუქრა", გამაოგნებელს უწოდებენ, ოპოზიციაში კი მიაჩნიათ, რომ კობახიძის განცხადება ბოდვაა.