მთავრობა პარლამენტს განახლებულ 4 წლიან სამთავრობო პროგრამას, დაახლოებით ერთ თვეში წარუდგენს - პრემიერი

მთავრობა პარლამენტს განახლებულ 4 წლიან სამთავრობო პროგრამას, დაახლოებით ერთ თვეში წარუდგენს - ამის შესახებ საქართველოს პრემიერ-მინისტრმა მთავრობის სხდომაზე განაცხადა.

ირაკლი კობახიძის თქმით, პროგრამა დაეფუძნება საარჩევნო პროგრამას, რომელიც მმართველმა გუნდმა წარადგინა. 

„ჩვენ ქართველმა ხალხმა უპრეცედენტო ნდობა გამოგვიცხადა და ეს უპრეცედენტო ნდობა ქართველი ხალხის წინაშე გვაკისრებს განსაკუთრებულ პასუხისმგებლობას. გვაქვს ამბიციური ამოცანები, რომელზეც არაერთხელ ვისაუბრეთ გასული კვირების განმავლობაში. ჩვენ წარვადგინეთ ძალიან დეტალური პროგრამა, რაც გადაითარგმნება სამთავრობო პროგრამაში. დაახლოებით ერთ თვეში მოგვიწევს პარლამენტის წინაშე განახლებული 4-წლიანი სამთავრობო პროგრამით წარვდგეთ. ეს პროგრამა დაეფუძნება საარჩევნო პროგრამას, რომელიც მმართველმა გუნდმა წარადგინა. ამ პროგრამას აქვს საერთო მიზანი. ჩვენ 4 წლის თავზე განვითარების სრულიად სხვა დონეზე უნდა გადავიყვანოთ ჩვენი ქვეყანა, რისთვისაც ყველანაირი საფუძველია შექმნილი. მთლიანობაში, ამ 12-წლიანმა პერიოდმა და განსაკუთრებით ამ ბოლო 4-წლიანმა პერიოდმა შექმნა ყველანაირი საფუძველი იმისთვის, რომ ჩვენი ქვეყანა 4 წლის თავზე განვითარების თვისებრივად სხვა დონეზე გადავიდეს, რაც არის ჩვენი, სამთავრობო გუნდის უმთავრესი ამოცანა“, - განაცხადა კობახიძემ.