როგორ გაყიდა ქონება აჭარის მთავრობამ 2020-2021 წლებში? - კვლევა

აუქციონები ერთი მონაწილით და საეჭვო პირდაპირი მიყიდვები -„საერთაშორისო გამჭვირვალობა საქართველო“ ახალ კვლევას ავრცელებს. არასამთავრობო ორგანიზაციის შეფასებით, აჭარის მთავრობა, სახელმწიფო ქონებას, არაკონკურენტულ გარემოში ასხვისებს.

მესამე სექტორი წერს, რომ 2020-21 წლებში აუქციონების 84 % ისე ჩატარდა, მათში მხოლოდ თითო პრეტენდენტი მონაწილეობდა. იყო შემთხვევები, როცა ძვირად ღირებული ქონება, პირდაპირ მიჰყიდეს მოქალაქეს  დაბალ ფასად, ახალმა მეპატრონემ კი 5 ათას ლარად ნაყიდი ნაკვეთი საკუთრებაში დარეგისტრირებიდან 1 დღეში 138 ათას 300  დოლარად მიყიდა შპს „გონიო 2020”-ს.  2020-21 წლებში, მთავრობამ უკონკურენტოდ, 33 აუქციონი გამართა, შემსყიდველებისგან კი ერთ მილიონ ლარამდე შემოწირულობა მიიღო.

ორგანიზაციის შეფასებით, ეს  ეჭვებს აჩენს სავარაუდო კორუფციულ გარიგებებთან დაკავშირებით, რითაც საგამოძიებო ორგანოები უნდა დაინტერესდნენ. კვლევა, ფინანსთა და ეკონომიკის სამინისტროდან და საჯარო რეესტრიდან გამოთხოვილ დოკუმენტებს ეყრდნობა.