ბათუმი „განდაგანას“ მასპინძლობს

ბათუმი „განდაგანას“ მასპინძლობს. სოფლის ტურიზმის ფესტივალი ტრადიციულად საშემოდგომო დეკორაციებით გაფორმებულ ევროპის მოედანზე იმართება. სტუმრებს საშუალება აქვთ ორი დღის განმავლობაში, ქალაქიდან გაუსვლელად აჭარულ სოფლებში იმოგზაურონ, დააგემოვნონ აჭარული კერძები, გაეცნონ  ტრადიციებსა და კულტურას. გასული წლის მსგავსად, წელსაც მთავარი აქცენტი  სამზარეულოსა და ხალხური რეწვის დარგების წარმოჩენაზე კეთდება. მოწყობილია კვების კუთხე, ტარდება მასტერკლასები და კულინარიული შეჯიბრებები.  დეკორაციებითაა გაფორმებული აჭარული რეწვის სივრცე. ბათუმელების განწყობაზე ადგილობრივ ფოლკლორულ ჯგუფებთან ერთად მოწვეული ბენდები და მუსიკალური შემსრულებლები ზრუნავენ.  სოფლის ტურიზმის ფესტივალი „განდაგანა“ 2015 წლიდან იმართება.